OSHEE Group ka raportuar rezultate pozitive nga zbatimi i skemave lehtësuese për shlyerjen e detyrimeve të prapambetura, me mbi 8,300 aktmarrëveshje të lidhura gjatë periudhës 2024–2025.
Sipas të dhënave zyrtare, deri më 2 shtator 2025 janë nënshkruar 7,083 marrëveshje me abonentë familjarë debitorë. Nga këta, 4,780 klientë shlyen të gjithë borxhin menjëherë, duke përfituar ulje të kamatëvonesës deri në 70%. Në segmentin jofamiljar, ku përfshihen bizneset, janë regjistruar 1,234 aktmarrëveshje, prej të cilëve 887 përfituan 50% reduktim të kamatës, ndërsa 34 abonentë likuiduan plotësisht detyrimin, duke përfituar falje 100% të saj.
Skemat e reja mbulojnë borxhet e krijuara deri më 31 dhjetor 2023, me pagesa të shpërndara në këste fikse mujore, të cilat paguhen krahas faturës së energjisë elektrike.
Familjarët në ndihmë ekonomike dhe pensionistët mund të shlyejnë debinë me këste mujore prej 1,200 lekësh.
Familjarët e tjerë paguajnë me këste prej 2,800 lekësh.
Bizneset kanë mundësi të shlyejnë borxhet sipas vlerës së detyrimit, me afat deri në 120 këste mujore.
Përveç pagesave me këste, OSHEE ka miratuar edhe skema faljeje të kamatëvonesës. Familjarët që shlyejnë detyrimet njëherësh përfitojnë 70% ulje, ndërsa bizneset që kryejnë pagesën totale marrin 100% falje të kamatës.
OSHEE sqaron se këto lehtësime vlejnë vetëm për abonentët që kanë shlyer në afat faturat e vitit 2024 dhe më pas. Nënshkrimi i aktmarrëveshjeve bëhet pranë qendrave të Kujdesit ndaj Klientit në të gjithë vendin. /skyweb.al
