Kushtet ekstreme të ngricave kanë detyruar mbylljen e aeroporteve në Vjenë, Pragë dhe Bratislavë, duke shkaktuar ndërprerje të gjera të fluturimeve në të gjithë Evropën Qendrore, raportoi “Reuters”.
Moti i acartë çoi në pezullimin e përkohshëm të operacioneve në Aeroportin e Vjenës, të paktën deri në orën 11:00. Sipas një zëdhënësi, në pistat e ngritjes dhe uljes u formua një shtresë e trashë akulli, e cila vazhdoi të krijohej pavarësisht përpjekjeve për pastrim. Për pasojë, shumë fluturime po devijohen drejt aeroporteve alternative.
Ndërkohë, kushtet e rënda dimërore kanë kufizuar ndjeshëm edhe funksionimin e Aeroportit të Pragës. Shiu i ngrirë e ka vënë aeroportin në një “modalitet shumë të kufizuar”, ndërsa autoritetet paralajmërojnë vonesa gjatë gjithë ditës dhe mbërritje të reduktuara, teksa ekipet punojnë për shkrirjen e akullit në pistën kryesore.
Edhe në Sllovaki, Aeroporti i Bratislavës u mbyll për shkak të motit ekstrem, me operacionet e pezulluara deri rreth orës 11:15.
Gjatë kësaj vale të fortë të ftohti, një stuhi e fuqishme dëbore e quajtur “Stuhia Goretti” solli deri në 15 centimetra borë, duke shkaktuar anulime fluturimesh drejt destinacioneve si Varshava, Parisi dhe Frankfurti, si dhe vonesa të mëdha, ndërsa ekipet në pista përpiqeshin të mbanin sipërfaqet të sigurta. /skyweb.al
