Besimi në ekonominë shqiptare vijoi të dobësohet gjatë muajit shtator, sipas vrojtimit periodik të Bankës së Shqipërisë.
Treguesi i ndjesisë ekonomike shënoi një tkurrje me 1.3 pikë, duke reflektuar rënien e pritshmërive në industri dhe tregti.
Ndërkohë, sektori i shërbimeve dhe konsumatorët regjistruan një përmirësim të lehtë të besimit.
Në industri, treguesi ra me 6.3 pikë përqindje, i ndikuar nga vlerësimet negative për prodhimin dhe pritjet e zbehta për porositë nga eksportet.
Bizneset e këtij sektori presin gjithashtu ulje të çmimeve në muajt e ardhshëm.
Në anën tjetër, konsumatorët kanë treguar më shumë optimizëm, me një rritje të besimit prej 0.8 pikësh.
Kjo lidhet kryesisht me mundësinë për të kryer blerje të mëdha në momentin aktual dhe me pritjet për konsum më të lartë në të ardhmen.
Megjithatë, ata mbeten skeptikë për gjendjen financiare dhe perspektivën ekonomike afatgjatë.
Shërbimet ishin një tjetër sektor pozitiv, me rritje të besimit prej 2.5 pikësh, të ndikuar nga kërkesa më e lartë e konsumatorëve.
Edhe këtu parashikohen ulje të çmimeve në vijim. Ndërtimi mbeti në të njëjtat nivele pa ndryshime domethënëse.
Në të kundërt, tregtia shënoi një rënie të ndjeshme me 9.7 pikë, duke prishur trendin rritës të dy muajve të fundit. Dobësimi u shkaktua kryesisht nga vlerësimet e pafavorshme për ecurinë aktuale të biznesit dhe pritjet më të ulëta për punësimin dhe çmimet në periudhën e ardhshme. /skyweb.al
