Kompania ukrainase SkyUp Airlines ka paditur Air Albania-n duke e akuzuar për shkelje të kontratës së qirasë ACMI, pasi kompania shqiptare ka përdorur avionë të një operatori tjetër ndërkohë që kishte kontratë aktive me SkyUp.
Siç mëson Skyweb.al, Air Albania kishte nënshkruar në shkurt një marrëveshje dyvjeçare për përdorimin e dy avionëve Boeing të SkyUp. Njëri prej tyre, një Boeing 737-800 me kod regjistrim UR-SQ, fluturoi për Air Albania vetëm për rreth një muaj, ndërsa i dyti, i përgatitur për të njëjtin operim, nuk u përdor kurrë nga kompania shqiptare.
“Air Albania sistematikisht dështoi të përmbushë detyrimet kontraktuale, veçanërisht ato që lidhen me pagesat dhe disiplinën financiare,” deklaroi SkyUp më herët duke theksuar se kishte pasur “vonesa në pagesat fillestare dhe parapagimet.”
Ajo që e përkeqësoi situatën, sipas kompanisë ukrainase, ishte zbulimi se Air Albania kishte firmosur në të njëjtën kohë një kontratë me një kompani tjetër ajrore, për të njëjtat fluturime që ishin planifikuar me avionët e SkyUp.
Kjo kompani, ishte operatori bullgar Fly2Sky.
“Ndërsa Air Albania përdorte avionët e një partneri tjetër, mjetet tona ajrore mbetën të palëvizura, duke na penguar të realizonim projekte të tjera,” thekson kompania ukrainase në padi duke kërkuar dëmshpërblim.
Padia është depozituar dhe seanca gjyqësore pritet të zhvillohet në dhjetor 2025.
Në industrinë e aviacionit, kontratat ACMI (Aircraft, Crew, Maintenance, Insurance) janë marrëveshje që lejojnë një kompani ajrore të përdorë avionë të një kompanie tjetër, me ekuipazh dhe mirëmbajtje të përfshirë, në këmbim të pagesës për orë fluturimi. Mosrespektimi i tyre shpesh çon në penalitete të larta dhe procese gjyqësore ndërkombëtare, si në rastin mes SkyUp dhe Air Albania.
Sipas verifikimeve të Skyweb.al, aktualisht Air Albania po operon vetëm me një avion të tipit Airbus A320, me kod regjistrimi LZ-FSA, të marrë me qira nga operatori bullgar Fly2Sky.
Ky avion kryen vetëm linjën Tiranë–Stamboll, me tre fluturime në ditë, ndërsa të gjitha destinacionet e tjera që kompania kishte pasqyruar më herët në sistemin e saj, si Bergamo, Milano, Bolonja dhe disa linja të tjera evropiane, janë pezulluar plotësisht. /skyweb.al
