Një raport i ri alarmues ka zbuluar se platforma TikTok i ka drejtuar të miturit drejt përmbajtjeve me përmbajtje seksuale përmes sugjerimeve të kërkimeve, pavarësisht kufizimeve të vendosura për mbrojtjen e fëmijëve. Zbulimi vjen nga një hetim i organizatës britanike “Global Ëitness”, një institucion i pavarur që monitoron etikën e korporatave dhe të drejtave të njeriut.
Global Ëitness krijoi 7 llogari të reja në TikTok në Mbretërinë e Bashkuar, duke u paraqitur si përdorues 13-vjeçarë, mosha minimale e lejuar për të hapur një llogari në këtë rrjet social. Hetuesit përdorën telefona të sapo prodhuar, pa asnjë histori të mëparshme kërkimi, për të garantuar që algoritmi i TikTok të bazohej vetëm në informacionin bazë të llogarive.
Pavarësisht aktivizimit të “modalitetit të kufizuar”, një opsion që sipas TikTok synon të kufizojë përmbajtjet e papërshtatshme për fëmijë, përfshirë ato me natyrë seksuale, llogaritë e rreme morën sugjerime kërkimi me përmbajtje seksuale, të papërshtatshme.
“Këto sugjerime ishin thellësisht shqetësuese për përdorues që pretendonin të ishin vetëm 13 vjeç dhe kishin aktivizuar edhe modalitetin e sigurisë”, deklaroi Global Ëitness.
Zbulimet vijnë në një kohë kur presioni mbi kompanitë teknologjike po rritet për të garantuar mbrojtjen e fëmijëve në internet. TikTok tashmë po përballet me disa padi në SHBA, ku akuzohet se ndikon negativisht në shëndetin mendor të përdoruesve të mitur. /Skyweb.al
