Presidenti i SHBA-së, Donald Trump, ka deklaruar se po shqyrton mundësinë e dërgimit të raketave lundruese me rreze të gjatë Tomahawk në Ukrainë, një lëvizje që mund të shënojë një përshkallëzim të ri në luftën mes Ukrainës dhe Rusisë.
I pyetur nga gazetarët në bordin e avionit Air Force One nëse do të dërgonte Tomahawk në Ukrainë, Trump u përgjigj: “Do të shohim… ndoshta po.”
Kjo deklaratë vjen pas një bisede të dytë telefonike gjatë fundjavës mes Trump dhe presidentit ukrainas Volodymyr Zelensky, i cili ka kërkuar rritjen e kapaciteteve ushtarake të Ukrainës për të ndërmarrë kundërsulme më të fuqishme ndaj forcave ruse.
Rusia ka paralajmëruar mw parw SHBA-në kundër furnizimit të Ukrainës me raketa me rreze të gjatë veprimi, duke thënë se kjo do të përshkallëzonte më tej konfliktin dhe do të tensiononte marrëdhëniet SHBA-Rusi. Raketat Tomahawk kanë një rreze prej rreth 2,500 km, që do të vendoste edhe Moskën brenda mundësive goditëse të Ukrainës.
Duke folur me gazetarët gjatë fluturimit për në Izrael, Trump tha se mund të diskutojë me Rusinë në lidhje me kërkesën e Ukrainës për raketat Tomahawk:
“Mund t’ua them rusëve se nëse lufta nuk përfundon, atëherë shumë mirë mund të ndodhë, ose jo, por mund të ndodhë.”
“A duan ata që Tomahawk të drejtohen në drejtimin e tyre? Nuk besoj,” shtoi presidenti amerikan.
Kievi ka kërkuar disa herë pajisje ushtarake me rreze të gjatë veprimi, pasi po shqyrton mundësinë e goditjes së qyteteve ruse larg vijës së frontit.
Në telefonatat mes Zelensky dhe Trump janë diskutuar përpjekjet e Ukrainës për të përforcuar mbrojtjen ajrore dhe për të siguruar armë të avancuara.
Ndërkohë, qytetet ukrainase, përfshirë kryeqytetin Kiev, kanë qenë vazhdimisht në shënjestër të sulmeve intensive ruse me dronë dhe raketa, duke dëmtuar rëndë infrastrukturën energjetike të vendit dhe shkaktuar ndërprerje të energjisë elektrike.
Muajin e kaluar, i dërguari i posaçëm i Trump për Ukrainën, Keith Kellogg, deklaroi për Fox News se presidenti ka autorizuar goditje të mundshme në territorin e thellë rus, duke thënë: “Nuk ka zona të sigurta” në këtë luftë. /Skyweb.al
