Një ide që dikur dukej fantashkencë po afrohet gjithnjë e më shumë me realitetin: mbledhja e energjisë diellore në orbitë dhe dërgimi i saj në Tokë përmes rrezeve të dritës.
Në mars, në një stadium futbolli amerikan në Florida, kompania Star Catcher realizoi një test të pazakontë, në vend të topave, u hodhën rreze të përqendruara drite nga një anë e fushës në tjetrën. Energjia vinte nga Dielli, e fokusuar nga lente gjigante dhe dërguar me saktësi në një ekran pranues. Synimi ishte të provohej nëse rrezet diellore mund të transmetohen përmes hapësirës për të furnizuar satelitë apo edhe Tokën me energji.
Kjo teknologji, e quajtur energjia diellore hapësinore, po ringjallet pas dekadash përpjekjesh. Ndryshe nga panelet diellore tokësore, ato në orbitë mund të mbledhin dritë pothuajse 24 orë në ditë, pa pengesat e atmosferës apo motit. Studiuesit besojnë se efikasiteti i tyre mund të jetë mbi 10 herë më i lartë se ai i paneleve në Tokë.
Vendet si SHBA, Britania, Japonia dhe Kina po investojnë tashmë në këtë drejtim. Sipas David Homfray nga kompania britanike Space Solar, teknologjia mund të sigurojë deri në 80% të nevojave të Evropës për energji të rinovueshme.
Megjithatë, sfidat janë të mëdha, ndërtimi i satelitëve të mëdhenj, transporti i tyre në orbitë dhe kostoja e lartë fillestare. Gjithashtu, disa forma të tjera të energjisë së gjelbër janë më të lira dhe më të shpejta për t’u zbatuar.
Përtej përdorimit civil, ushtria amerikane e sheh këtë teknologji si mënyrë për të dërguar energji në çdo pikë të globit, për operacione në terren ose në raste fatkeqësish.
Koncepti nuk është i ri. Shkrimtari i njohur Isaac Asimov e përmendi për herë të parë në vitin 1941, ndërsa NASA e studioi seriozisht në vitet 1970 dhe 1990. Sot, me përparimet në panele diellore dhe teknologjitë e transmetimit me mikrovala ose lazer, ekspertët si John Mankins, ish-fizikan i NASA-s, besojnë se kjo ide është më afër se kurrë.
“Është shumë më pranë realitetit sesa mendojnë njerëzit,” thotë Michelle Hanlon, një ndër mbështetëset e projektit. Nëse planet ecin sipas pritshmërive, rrezet e para të energjisë diellore nga hapësira mund të arrijnë Tokën brenda një dekade. /Skyweb.al
