Pas gati 20 vitesh, pasagjerët që udhëtojnë nga aeroportet në Shtetet e Bashkuara nuk do të detyrohen më të heqin këpucët gjatë kontrollit të sigurisë, sipas CNN.
Sekretarja për shtyp e Shtëpisë së Bardhë e cilësoi këtë si një “lajm të madh” nga Departamenti i Sigurisë Kombëtare, në një reagim në rrjetin social X.
Megjithatë, Administrata e Sigurisë së Transportit (TSA) ende nuk e ka konfirmuar zyrtarisht vendimin.
Sipas një deklarate publike nga TSA, “TSA dhe DHS janë gjithmonë në kërkim të mënyrave të reja dhe inovative për të përmirësuar përvojën e pasagjerëve dhe të forcojnë sigurinë. Çdo përditësim i mundshëm do të shpallet përmes kanaleve zyrtare.”
Ky ndryshim u raportua fillimisht nga blogu Gate Access, pas një memorandumi të brendshëm që u zbulua të hënën.
Sipas raportimeve të WSTM, një televizion lokal i lidhur me CNN, pasagjerët në aeroportin Hancock në Syracuse të Nju Jorkut nuk u detyruan të heqin këpucët të hënën.
Megjithatë, të martën në mëngjes, CNN raportoi se udhëtarëve në aeroportin O’Hare në Çikago ende u kërkohej ta bënin këtë.
Detyrimi për heqjen e këpucëve nisi pas ngjarjes së dhjetorit 2001, kur Richard Reid, u përpoq të shpërthente eksplozivë të fshehur në këpucët e tij gjatë një fluturimi nga Parisi në Miami.
Masa u bë e detyrueshme rreth pesë vjet më vonë, pas informacioneve të inteligjencës për kërcënime të vazhdueshme, veçanërisht pas tentativës së vitit 2006 për të shpërthyer lëndë plasëse të lëngshme në fluturime transatlantike, ngjarje që sollën edhe rregullin famëkeq “3-1-1” për lëngjet në bagazhet e dorës. /skyweb.al
