“Royal Mint” ka prezantuar një koleksion të ri monedhash të dedikuara ikonës së “Queen”, Freddie Mercury, raportoi “Independent”.
Dizajni i realizuar me imtësi paraqet figurën e Mercury-t në skenë, të shoqëruar me nënshkrimin e tij karakteristik. Çdo element i monedhës rrëfen talentin e jashtëzakonshëm të këngëtarit, përfshirë diapazonin e tij të famshëm me katër oktava, i cili simbolizohet nga një vijë muzikore që shtrihet përgjatë skajeve — nga notat më të ulëta deri te ato më të lartat.
Frymëzimi për dizajnin vjen edhe nga performanca legjendare e Mercury-t në koncertin bamirës “Live Aid”, të mbajtur më 13 korrik 1985 në Wembley të Londrës dhe në stadiumin JFK në Filadelfia. Në disa nga variantet e monedhës janë përfshirë edhe ngjyra të veçanta, si xhaketa e tij ikonike e verdhë dhe lëvizjet e gjalla në skenë.
Koleksioni shënon një moment të rëndësishëm, pasi përkon me 40-vjetorin e “Live Aid” dhe publikimin e albumit solo të Mercury-t, “Mr Bad Guy”, po ashtu në vitin 1985.
“Freddie Mercury nuk ishte thjesht një artist, por një forcë që transformonte çdo skenë. Kjo monedhë kap energjinë e tij dhe nderon një ikonë globale, frymëzimi i së cilës vazhdon edhe sot. Çdo detaj, nga nënshkrimi te stema muzikore që simbolizon gamën e tij vokale, e bën këtë një nga monedhat tona më të veçanta përkujtimore”, u shpreh Rebecca Morgan, drejtoreshë e monedhave përkujtimore në “Royal Mint”.
Kjo monedhë e re i bashkohet serisë së figurave të mëdha të muzikës që Royal Mint ka nderuar ndër vite, përfshirë David Bowie, George Michael, Dame Shirley Bassey dhe Sir Paul McCartney.
Në një akt filantropik, Royal Mint do të dhurojë një version të artë të monedhës për “Mercury Phoenix Trust”, organizatën kundër AIDS të themeluar në kujtim të këngëtarit. Organizata pritet ta nxjerrë monedhën në ankand gjatë muajve të ardhshëm, duke vazhduar misionin e Mercury-t për mbështetjen e personave të prekur nga HIV dhe AIDS. /Skyweb.al
