Juristi Ylli Manjani, i ftuar në Euroneës Albania në emisionin Now me Erla Mëhillin, ka komentuar vendimin e GJKKO-s për të pezulluar nga detyra zv.kryeministren Belinda Balluku.
Manjani e ka cilësuar këtë veprim si një ndërhyrje në punën e qeverisë dhe, sipas tij, një lloj “grushti shteti”.
“Shteti nuk mund të funksionojë pa Kryeministër dhe pa ministra. Problemi këtu është pushteti përballë pushtetit. Unë e kuptoj një prokuror dallkauk dhe egoist, sepse janë palë dhe kërkojnë të krijojnë statistika.
Ky vendim i gjykatës sot e ka lënë vendin pa qeveri. Kjo është pyetja që shtrohet: a mund ta pezullojë gjykata një zv.kryeministër?
Në çdo grusht shteti veprohet me ligj, jo pa ligj. Edhe grushtet e shtetit bëhen brenda ligjit. Çështja është kjo: me ndërhyrjen që ka bërë GJKKO, vendi ka mbetur pa qeveri, dhe kjo përbën një grusht shteti”-tha Manjani.
Sipas Manjanit, neni i Kushtetutës është i qartë për personat e zgjedhur; edhe Balluku, sipas tij, është e zgjedhur, dhe ky vendim përbën një ndërhyrje në punën e një pushteti tjetër.
“Tani doni ligjin? Belinda Balluku është person apo funksion? Belinda Balluku është person i zgjedhur, ka marrë votat e popullit. Çdo anëtar i qeverisë, sipas Kushtetutës së vendit, është në statusin e deputetit.
Imuniteti që i është dhënë qeverisë, i është dhënë pushtetit për t’u mbrojtur nga një pushtet tjetër. Ligjet nuk duhen parë të shkëputura. Kemi ndërhyrje të gjyqësorit te qeveria. Është pezulluar si person i zgjedhur, sipas nenit të Kushtetutës,” u shpreh juristi.
Më tej Manjani thotë se kryeministri duhet ta dërgojë në Kushtetuese, vendimin.
