Komisioni i Prokurimit Publik ka hequr pezullimin disa mujor të tenderit të madh të AKSHI-t për shërbimin e internetit dhe intranetit, duke i hapur rrugën vijimit të procedurave pas reflektimit të ndryshimeve në dokumentet e tenderit. Vendimi erdhi pas njoftimit zyrtar të Agjencisë Kombëtare të Shoqërisë së Informacionit më 10 dhjetor, ku konfirmohej se të gjitha kërkesat e pranuara nga KPP ishin pasqyruar tashmë në dokumentacion.
Tenderi, me fond limit 486 milionë lekë ose 4.8 milionë euro, ishte pezulluar pas një serie ankesash nga operatorët më të mëdhenj të tregut, të cilët ngritën shqetësime të forta për raportin mes fondit limit dhe kërkesave teknike të AKSHI-t.
KPP pranoi një pjesë të argumenteve dhe kërkoi ndryshime të detyrueshme, duke bllokuar procedurën deri në reflektimin e tyre.
Sipas vendimit të fundit, KPP konstaton se AKSHI ka modifikuar dokumentet sipas përcaktimeve të Vendimit nr. 1394/2025 dhe ka publikuar shtojcën përkatëse në sistemin e prokurimeve elektronike, duke i lejuar tashmë autoritetit kontraktor të vijojë me hapat e radhës.
Në ankesat e tyre, siç raportoi më herët Skyweb.al, pesë kompani të mëdha, One Albania, MC Networking, Abissnet, Vodafone Albania dhe Albanian Satellite Communication, argumentuan se fondi limit është i pamjaftueshëm për kapacitetet e kërkuara dhe nuk përputhet me praktikat e sektorit të telekomunikacionit. Operatoret kërkojnë rritjen e fondit limit ose uljen e kërkesave teknike, pasi, sipas tyre, me parametrat aktualë tenderi nuk mund të realizohet pa humbje.
Disa kompani kanë paraqitur edhe përllogaritje teknike, duke argumentuar se prezantimi i volumit të shërbimit “në formën e një shume të përgjithshme” krijon paqartësi, detyron ofertuesit të bazohen në supozime dhe nuk përcakton shpejtësitë e dedikuara për çdo institucion publik. Operatorët kërkojnë që AKSHI të publikojë qartë kapacitetet, institucionet përfituese dhe parametrat teknikë të shërbimit.
Tenderi është konceptuar si marrëveshje kuadër dyvjeçare, me synimin për të lidhur kontrata me katër kompani fituese. Afati për dorëzimin e ofertave ishte planifikuar për 22 shtator 2025, ndërsa pret që të rihapet pasi tenderi është zhbllokuar.
Tenderët e AKSHI-t kanë qenë shpesh në qendër të debateve, ankesave në KPP dhe hetimeve të SPAK, ndërsa megatenderi i internetit pritet të rikthehet sërish në fokus për shkak të volumit të tij të madh dhe kërkesave të operatorëve që paralajmërojnë se pa rishikim fondi apo ulje kërkesash teknike, procedura rrezikon të jetë e pazbatueshme në praktikë.
