“American Hospital” e mbylli vitin 2024 me një rezultat financiar pozitiv, duke realizuar 170 milionë lekë fitim dhe 5.6 miliardë lekë të ardhura, me rritje vjetore prej 3.2 për qind.
Ky është viti i parë i plotë pas bashkimit me “International Hospital” (ish-Hygeia), proces që solli rritje të sinergjive, optimizim të burimeve dhe forcim të kapaciteteve spitalore në të gjithë grupin.
Performanca e vitit 2024 konfirmon se strategjia e konsolidimit, investimet në teknologji dhe rritja e cilësisë së shërbimit po sjellin rezultate të prekshme. Bashkimi i dy spitaleve rriti kapacitetet operative, zgjeroi gamën e shërbimeve dhe rriti me 20 për qind numrin e stafit, që arriti në 1636 punonjës, duke e bërë “American Hospital” një nga punëdhënësit më të mëdhenj në sektorin privat të shëndetësisë.
Sipas raportit të aktivitetit, nëse bashkimi me “International Hospital” do të kishte qenë aktiv që në ditën e parë të vitit financiar, të ardhurat e vitit 2024 do të arrinin 7.6 miliardë lekë. Kjo tregon qartë se integrimi i dy spitaleve ka rritur ndjeshëm efikasitetin, vëllimin e shërbimeve dhe kapacitetin e përgjithshëm të grupit.
Edhe “International Hospital”, pjesë e grupit që nga viti 2018, mbylli rrugëtimin e tij si ent juridik i veçantë me një kontribut të qëndrueshëm gjatë këtyre viteve: 17.2 miliardë lekë të ardhura dhe fitim në vitin 2023, para bashkimit final në vitin 2024. Ky proces i dha mundësi që ekspertiza, infrastruktura dhe aparaturat e investuara ndër vite të integroheshin plotësisht në një sistem unik shëndetësor modern.
Në një treg ku investimet në teknologji, standardet e larta dhe burimet njerëzore kërkojnë angazhim të vazhdueshëm, “American Hospital” po arrin të ruajë ritmin e zhvillimit dhe të forcojë rolin e vet si qendra më e madhe spitalore private në Shqipëri. Rezultatet e vitit 2024 janë një tregues se transformimi i nisur disa vite më parë ka hyrë në një fazë të qëndrueshme dhe të qëllimshme rritjeje.
Operatori po synon që gjatë viteve në vijim të zgjerojë më tej shërbimet, të rrisë investimet në teknologji mjekësore dhe të vazhdojë të jetë një pikë referimi për cilësi, inovacion dhe besueshmëri në shëndetësinë private shqiptare. /skyweb.al
