Presidenti i Shteteve të Bashkuara, Donald Trump, ka pezulluar sot, më 19 dhjetor, programin e llotarisë së kartës së gjelbër (Diversity Visa – DV1), pas një sulmi me armë zjarri në Universitetin Brown, ku humbën jetën dy studentë dhe u plagosën nëntë të tjerë.
I dyshuari për sulmin ishte Claudio Neves Valente, 48 vjeç, shtetas portugez, i cili kishte hyrë në SHBA në vitin 2017 përmes programit të llotarisë së vizave dhe kishte marrë kartën e gjelbër. Ai u gjet i vdekur të enjten, më 18 dhjetor, në një depo në Salem, New Hampshire, ku dyshohet se kishte kryer vetëvrasje me armë zjarri. Sekretarja e Sigurisë Kombëtare, Kristi Noem, deklaroi se pezullimi i programit u bë me urdhër të Trump, me arsyetimin për të “siguruar që asnjë amerikan tjetër të mos dëmtohet nga ky program”.
Trump ka shprehur kundërshtimin ndaj llotarisë së kartës së gjelbër që prej vitit 2017, pas një sulmi në New York ku u vranë tetë persona. Autori i atij sulmi, Sayfullo Saipov, kishte hyrë gjithashtu në SHBA përmes DV1 dhe dyshohej se kishte lidhje me ISIS.
Autoritetet amerikane besojnë se Neves Valente është i përfshirë edhe në vrasjen e profesorit të MIT-it, Nuno F. Gomes Loureiro, 47 vjeç, i cili u qëllua për vdekje në shtëpinë e tij në Brookline, Massachusetts, dy ditë përpara sulmit në Brown. Të dy kishin studiuar në të njëjtin universitet në Portugali në fund të viteve ’90.
Hetuesit arritën të identifikonin të dyshuarin pas një ndjekjeje gjashtëditore në disa shtete, duke përdorur pamje nga kamerat e sigurisë dhe informacione të marra nga publiku. Një automjet me qira u lidh me të dyja ngjarjet kriminale.
Presidentja e Universitetit Brown, Christina Paxson, sqaroi se Neves Valente kishte qenë student doktorature në fizikë në këtë universitet gjatë viteve 2000–2001, por nuk kishte asnjë lidhje aktuale me institucionin.
Dy studentët e vrarë në sulmin në Brown janë identifikuar si Ella Cook, 19 vjeçe nga Alabama, dhe Mukhammad Aziz Umurzokov, 18 vjeç. Motivet e sulmeve vazhdojnë të mbeten të paqarta. /Skyweb.al
