Agjencitë e udhëtimit dhe operatorët turistikë nga Shqipëria pritet të kenë më shumë lehtësi për të ofruar shërbimet e tyre në vendet e rajonit, pa u përballur me procedura të dyfishta licencimi.
Këshilli i Ministrave i ka paraqitur Kuvendit për ratifikim vendimin e Komitetit të Përbashkët të CEFTA-s “Për lehtësimin e tregtisë së shërbimeve të ofruara nga agjencitë e udhëtimit dhe operatorët turistikë”.
Sipas relacionit shoqërues, ky vendim synon të parandalojë që rregullat për ushtrimin e veprimtarisë turistike të shndërrohen në pengesa për tregtinë e shërbimeve, duke siguruar trajtim të barabartë dhe mosdiskriminim për operatorët nga vendet anëtare të CEFTA-s.
Një nga pikat kryesore të vendimit është mundësia që shërbimet turistike të ofrohen edhe në mënyrë të përkohshme në vendet e tjera të rajonit, pa qenë e nevojshme hapja e një zyre apo pajisja me një licencë të re. Kjo pritet të nxisë konkurrencën dhe të forcojë bashkëpunimin rajonal në sektorin e turizmit.
Projektligji bën pjesë në angazhimet e Shqipërisë në kuadër të Marrëveshjes së CEFTA-s dhe zhvillimit të Tregut të Përbashkët Rajonal, i cili bazohet në parimet e Bashkimit Evropian. /skyweb.al
