Nikotina është e dëmshme për zemrën dhe enët e gjakut, por ndikimi i saj negativ shtrihet edhe më gjerë. Ajo është e rrezikshme në çdo formë përdorimi: qoftë përmes cigareve tradicionale, cigareve elektronike apo produkteve me duhan të nxehtë, shkruan salute.eu.
Sipas ekspertëve, nikotina dëmton sistemin kardiovaskular pavarësisht mënyrës së konsumimit. Edhe përdorimi i saj në formë të thithjes së ngadaltë, siç është snusi, mbart rreziqe serioze për shëndetin. Snusi është një qese e vogël që përmban duhan dhe vendoset midis buzës dhe mishrave të dhëmbëve, ku nikotina përthithet përmes mukozës së gojës.
Ky produkt duhani, me origjinë suedeze, është i ndaluar në shumicën e vendeve të Evropës, me përjashtim të Suedisë.
Rreziqet e nikotinës janë evidentuar edhe në raste konkrete. Në Itali janë regjistruar episode serioze shëndetësore, si rasti i dy vajzave 13-vjeçare nga Ferrara, të cilat u shtruan në spital disa muaj më parë për shkak të mbidozës së nikotinës. Ato shfaqën simptoma të rënda, si rrahje të shpejta të zemrës, të përziera dhe marramendje, duke vënë në rrezik jetën e tyre. /skyweb.al
