Shembja e segmentit të rrugës Librazhd-Pogradec lidhet kryesisht me sasinë e jashtëzakonshme të reshjeve gjatë këtij viti, të cilat sipas ekspertëve kanë tejkaluar ndjeshëm nivelet e viteve të fundit. Shërbimi Gjeologjik Shqiptar konfirmon se fenomeni i mbingopjes së strukturave nga uji ka qenë faktori kryesor që çoi në cedimin e trupit të rrugës.
Specialisti Ardian Bylyku shpjegon se reshjet e regjistruara kanë qenë rreth trefishi i totalit të dy viteve të mëparshme së bashku, duke krijuar presion të lartë mbi terrenin dhe duke sjellë mbingarkesë strukturore. Sipas tij, kjo situatë ka çuar në dobësimin progresiv të shtresave mbajtëse deri në momentin e dështimit.
Shërbimi Gjeologjik ka nisur një proces të plotë ekspertimi për të kuptuar në detaje mekanizmin e rrëshqitjes dhe për të identifikuar zgjidhjet teknike më të përshtatshme. Në kuadër të këtij studimi do të realizohen rreth 500 metra linearë shpime, të cilat do të shoqërohen me analiza laboratorike dhe interpretim të të dhënave gjeologjike.
Rezultatet e këtyre analizave pritet t’i shërbejnë institucioneve përgjegjëse për të përcaktuar ndërhyrjet konkrete që duhen ndërmarrë për stabilizimin e zonës dhe rikthimin e sigurisë në këtë aks rrugor.
Autoritetet theksojnë se rekomandimet përfundimtare do të dalin pas përfundimit të studimeve, ndërsa puna në terren do të vazhdojë deri në hartimin e një plani të plotë ndërhyrjeje për të shmangur përsëritjen e situatave të ngjashme në të ardhmen. /skyweb.al
