Drejtuesit e mjeteve që po kthehen në shtëpitë e tyre pas sezonit të festave këshillohen të planifikojnë udhëtimet me kujdes, në mënyrë që të shmangin trafikun e rënduar, duke marrë parasysh edhe bllokimet e rrugëve nga protestat e fermerëve, njoftoi Shtabi i Policisë Greke.
Në një deklaratë zyrtare, policia bëri të ditur se vazhdojnë të zbatohen masa të synuara dhe të përkohshme, me qëllim rritjen e sigurisë rrugore dhe mbrojtjen e jetës së qytetarëve.
Këto masa lidhen drejtpërdrejt me praninë e mjeteve të rënda bujqësore dhe këmbësorëve në rrugë, të cilat krijojnë kushte të rrezikshme për qarkullimin.
Policia theksoi se masat janë të domosdoshme për menaxhimin e situatave objektivisht të rrezikshme dhe nuk përbëjnë mbyllje arbitrare të rrugëve.
Qytetarët ftohen të informohen në kohë reale për ndryshimet në qarkullim përmes faqes zyrtare të Policisë Greke në internet.
Gjithashtu, policia rrugore u rekomandoi drejtuesve të mjeteve që të marrin parasysh kushtet atmosferike gjatë planifikimit të udhëtimit të kthimit, veçanërisht në rrugët me korsi të kufizuara.
Autoritetet bënë të ditur se do të vazhdojnë të zbatojnë të gjitha masat e jashtëzakonshme të nevojshme për aq kohë sa situata ta kërkojë. /skyweb.al
