Me përmbylljen e vitit 2025, Shqipëria ka shënuar një rekord të ri në turizëm, duke tejkaluar shifrën e 12 milionë vizitorëve me pasaportë të huaj, më shumë se një vit më parë.
Ministri i Turizmit, Kulturës dhe Sportit, Blendi Gonxhja, e vlerësoi si një tregues të konsolidimit të Shqipërisë si një destinacion turistik gjatë gjithë vitit.
Sipas tij, vendi po regjistron interes të qëndrueshëm edhe përtej sezonit veror, falë ofertave të larmishme që përfshijnë turizmin kulturor, natyror, kulinar, sportiv dhe forma të tjera, duke forcuar kështu pozicionin e Shqipërisë në hartën ndërkombëtare të turizmit.
Shqipëria tashmë ofron një paketë të plotë turizmi gjithëvjetor, me atraksione të shumëllojshme në të gjithë territorin. Në jug, plazhet me gurë dhe ujërat e kristaltë vijojnë të tërheqin numrin më të madh të vizitorëve, ndërsa në veri destinacione si Thethi dhe Valbona janë gjithnjë e më të preferuara. Qytete historike si Gjirokastra, Berati, Butrinti, Kruja, Tirana dhe Shkodra mbeten ndër më të kërkuarat në çdo stinë për turizëm kulturor dhe historik.
Gjatë vitit 2025, edhe muzetë dhe parqet kombëtare kanë regjistruar fluks të lartë vizitorësh, duke tërhequr qindra mijëra turistë vendas dhe të huaj. /skyweb.al
