Kompania finlandeze e syzeve IXI po përgatitet të lançojë syze inteligjente me autofokus, të cilat nga pamja duken si syze të zakonshme, por që rregullojnë automatikisht fokusin sipas nevojave të përdoruesit. Teknologjia synon të zëvendësojë bifokalët dhe varifokalët tradicionalë, duke eliminuar shumë nga kufizimet e tyre.
Syzet përdorin sensorë për gjurmimin e syrit dhe lente me kristale të lëngshme, të cilat ndryshojnë recetën në çast. Ndryshe nga bifokalët dhe varifokalët — që kërkojnë që përdoruesi të shikojë në një zonë të caktuar të lentes për fokus të saktë, syzet e IXI ofrojnë një fushë shumë më të gjerë shikimi të qartë, veçanërisht për distancë të largët. Zona për lexim shfaqet vetëm kur nevojitet dhe zhduket pjesën më të madhe të kohës.
Sipas CEO-s së IXI, Niko Eiden, përparësia kryesore është se përdoruesit mund të shohin larg me të gjithë sipërfaqen e lentes, “ashtu si dikur, përpara se të kishin nevojë edhe për syze leximi”. Kjo adreson një nga problemet kryesore të varifokalëve, të cilët kanë kanale të ngushta shikimi dhe shkaktojnë shtrembërime në shikimin periferik.
Syzet peshojnë rreth 22 gramë dhe kërkojnë karikim gjatë natës përmes një porte magnetike të fshehur në krahun e syzeve. IXI pranon se ekzistojnë disa shtrembërime vizuale në zonat kufitare të lentes, por kompania thotë se ato janë minimale dhe zakonisht të padukshme gjatë përdorimit normal. Në rast defekti, syzet kalojnë automatikisht në një mënyrë sigurie me fokus bazë për shikim në distancë.
Kompania, e cila ka rreth 75 punonjës dhe ka mbledhur mbi 40 milionë dollarë financim, planifikon ta hedhë produktin në treg brenda vitit të ardhshëm. Çmimi pritet të jetë në segmentin shumë të lartë të tregut të syzeve. Fillimisht do të ofrohen vetëm disa forma, ndërsa prodhimi do të bëhet në Finlandë.
Ekspertë të pavarur vlerësojnë se teknologjia është e realizueshme dhe premtuese, megjithëse në fillim mund të shihet si risi me përdorim të kufizuar. IXI do ta lançojë produktin fillimisht në Evropë pas miratimeve rregullatore, përpara se të kërkojë miratim nga FDA për tregun amerikan.
Eiden e krahason këtë hap me futjen e autofokusit në kamera: “Pas varifokalëve, industria e syzeve nuk ka inovuar shumë. Ne duam ta ndryshojmë këtë. Ndoshta pas 10–15 vitesh, njerëzit do të pyesin veten si i mbanim syzet me fokus fiks në të kaluarën.” /skyweb.al
