Përveç kampusit universitar të Tiranës, qeveria planifikon ndërtimin e një kampusi të ri edhe në Durrës, i cili do të shërbejë jo vetëm për studentët e këtij qyteti, por edhe për ata që studiojnë në kryeqytet. Lajmi u bë i ditur sot nga kryeministri Edi Rama gjatë një takimi me rektorët e universiteteve.
Sipas Ramës, ky projekt synon të adresojë një nga problemet kryesore me të cilat përballen studentët, atë të qirave të larta në Tiranë, duke ofruar mundësi strehimi më të përballueshme përmes rezidencave studentore në Durrës.
“Kemi bërë investime domethënëse, por jemi akoma larg përmbushjes së kushteve infrastrukturore për të përballuar sfidat dhe nevojat. Kemi dy kampuse përpara, kampusin e madh të Tiranës dhe kemi hapur procesin për kampusin e universitetit Aleksandër Moisiu.
Kemi pasur interes nga 40 studio ndërkombëtare dhe ka interes për të krijuar infrastrukturë rezidencë të studentëve, duke parur parasysh trenin që do jetë në funksion së shpejti, do jetë shumë e thjeshtë që studentët që do jenë në Tiranë të kenë mundësi të strehohen në kampusin e Durrësit dhe për këtë arsye do ndërtojmë një kompleks shumë të mirë në mënyrë që të ndihmojmë në zgjedhjen e një problemi të madh që kanë studentët për shkak të qirave të larta në Tiranë, edhe në Durrës. Jemi të bindur që jemi në një moment të ri ndryshimi për arsimin e lartë, por ndryshe nga ndryshimi i parë”, tha Rama. /skyweb.al
