Qëndrimi në një këmbë mund të duket një ushtrim i thjeshtë, por sipas ekspertëve është një tregues i rëndësishëm i shëndetit fizik dhe mendor, sidomos pas moshës 50 vjeç. Studimet tregojnë se aftësia për të ruajtur ekuilibrin bie me moshën dhe lidhet drejtpërdrejt me humbjen e masës muskulore, shëndetin e trurit, shkruan BBC.
Hulumtimet kanë zbuluar se personat që nuk arrijnë të qëndrojnë në një këmbë për të paktën 10 sekonda kanë rrezik më të lartë për probleme shëndetësore dhe madje për vdekje të parakohshme. Ky ushtrim i thjeshtë kërkon bashkërendim mes muskujve, syve, sistemit të ekuilibrit në veshin e brendshëm dhe trurit, ndaj shihet edhe si një pasqyrë e funksionimit neurologjik.
Lajmi i mirë është se ekuilibri mund të përmirësohet me ushtrime të rregullta. Specialistët rekomandojnë që të rriturit, veçanërisht mbi 65 vjeç, të praktikojnë ushtrime në një këmbë disa herë në javë, madje edhe gjatë aktiviteteve të përditshme si larja e dhëmbëve. Ushtrime si joga dhe tai chi janë gjithashtu të lidhura me plakje më të shëndetshme dhe ulje të rrezikut të rënieve. /skyweb.al
