Agjencia e Sigurisë së Aviacionit të Bashkimit Evropian (EASA) u ka bërë thirrje kompanive ajrore që të shmangin përkohësisht hapësirën ajrore të Iranit, duke iu referuar “situatës aktuale të sigurisë dhe rrezikut të mundshëm të veprimeve ushtarake amerikane” në rajon.
Në njoftimin e saj, EASA u kërkoi operatorëve të fluturimeve të tregojnë kujdes të shtuar dhe të përgatisin plane alternative për operacionet dhe itineraret që kalojnë mbi vendet fqinje, veçanërisht zonat ku ndodhen baza ushtarake amerikane.
Paralajmërimi do të jetë në fuqi deri më 16 shkurt dhe, sipas agjencisë, fillimisht është parashikuar të zgjasë një muaj.
Që prej nisjes së protestave masive kundër sundimit autoritar të Republikës Islamike, më shumë se dy javë më parë, presidenti amerikan Donald Trump ka kërcënuar disa herë Iranin me ndërhyrje ushtarake.
EASA theksoi se forcat iraniane të mbrojtjes ajrore ndodhen “në një nivel të shtuar gatishmërie” për shkak të përshkallëzimit të tensioneve, duke paralajmëruar se aktualisht ekziston një rrezik më i lartë i identifikimit të gabuar të avionëve brenda hapësirës ajrore iraniane.
“Prania dhe përdorimi i mundshëm i një game të gjerë armësh dhe sistemesh të mbrojtjes ajrore, së bashku me reagime të paparashikueshme shtetërore dhe mundësinë e aktivizimit të sistemeve raketore tokë-ajër (SAM), përbëjnë një rrezik të lartë për fluturimet civile në të gjitha lartësitë,” thuhet në deklaratën e autoritetit.
Situata, sipas EASA-s, po monitorohet nga afër për të vlerësuar vazhdimisht nivelin e rrezikut.
Ndërkohë, sipas raportimeve të mediave amerikane, Shtetet e Bashkuara po rrisin praninë e tyre ushtarake në Lindjen e Mesme, përfshirë dislokimin e aeroplanmbajtëses “USS Abraham Lincoln” dhe disa anijeve shoqëruese. Deri tani, megjithatë, nuk ka pasur një konfirmim zyrtar nga Pentagoni.
