Presidenti i Republikës, Bajram Begaj, kërkoi një drejtësi funksionale, të pavarur dhe me integritet, gjatë fjalës së mbajtur në ceremoninë e hapjes së vitit të ri gjyqësor.
Kreu i Shtetit e nisi mesazhin e tij duke theksuar rolin themelor të drejtësisë në jetën e qytetarëve, duke e cilësuar atë jo thjesht si një pushtet, por si garancinë që i jep kuptim shtetit të së drejtës.
Presidenti Begaj rikonfirmoi mbështetjen për institucionet e dala nga reforma në drejtësi, e nisur një dekadë më parë, duke vlerësuar se rezultatet e saj tashmë janë të prekshme.
Sipas tij, një pjesë e madhe e qytetarëve besojnë se epoka e pandëshkueshmërisë ka nisur të marrë fund, ndërsa vëmendja e publikut, mediave dhe partnerëve ndërkombëtarë është përqendruar te puna e strukturave të posaçme si SPAK dhe GJKKO. Megjithatë, ai theksoi se drejtësia nuk përfaqësohet vetëm nga këto institucione, por edhe nga gjyqtarë dhe prokurorë të tjerë që, sipas tij, po ushtrojnë detyrën me profesionalizëm dhe përgjegjësi.
Presidenti vuri theksin te kultura e re juridike e krijuar pas reformës dhe nevoja që vendimet gjyqësore të respektohen nga të gjithë, duke nënvizuar se drejtësia funksionon vetëm kur zbatohet dhe jo vetëm kur shpallet.
Në fjalën e tij, Kreu i Shtetit e lidhi drejtpërdrejt funksionimin e drejtësisë me procesin e integrimit evropian, duke theksuar se vetëm përmes forcimit të shtetit të së drejtës, sundimit të ligjit dhe mbrojtjes së të drejtave të njeriut, Shqipëria mund të ecë përpara drejt anëtarësimit në Bashkimin Evropian.
Presidenti Begaj theksoi se ky vit gjyqësor duhet të shënojë konsolidimin e një drejtësie të qëndrueshme, duke vlerësuar rolin e Gjykatës Kushtetuese dhe Gjykatës së Lartë në krijimin e praktikave unifikuese dhe garantimin e sigurisë juridike.
Ai nënvizoi gjithashtu rëndësinë e institucioneve të qeverisjes së sistemit të drejtësisë, si Këshilli i Lartë Gjyqësor, Këshilli i Lartë i Prokurorisë, Inspektori i Lartë i Drejtësisë, Këshilli i Emërimeve në Drejtësi dhe Shkolla e Magjistraturës, si elementë kyç për transparencën dhe llogaridhënien.
Duke u ndalur te pavarësia e gjyqësorit, Presidenti e cilësoi atë si boshtin kryesor të reformës në drejtësi dhe kërkoi që gjyqtarët të marrin vendime pa presione dhe ndërhyrje, në përputhje me standardet evropiane. Ai theksoi se autonomia e fituar nga sistemi është një arritje madhore, por ajo duhet të shoqërohet domosdoshmërisht me përgjegjësi dhe integritet.
Sipas Kreut të Shtetit, besueshmëria e drejtësisë lidhet drejtpërdrejt me efikasitetin e saj, rezultatet në luftën kundër korrupsionit dhe krimit të organizuar, si dhe me shmangien e arbitraritetit.
Ai u ndal edhe te zvarritja e çështjeve, duke e cilësuar atë si një problem serioz që ndikon drejtpërdrejt në jetën, pronën dhe të drejtat e qytetarëve.
Presidenti Begaj u bëri thirrje gjyqtarëve që këtyre praktikave t’u vihet fund, duke theksuar se në institucionet e drejtësisë nuk ka më vend për mentalitet tranzicioni dhe se dhënia e drejtësisë është një akt i lartë përgjegjësie shtetërore.
Në përmbyllje, Kreu i Shtetit garantoi mbështetjen e tij për forcimin e pavarësisë dhe funksionalitetit të sistemit të drejtësisë, duke theksuar se do të vijojë të mbetet një zë i qartë në mbrojtje të interesit të qytetarëve që presin drejtësi të ndershme, funksionale dhe të barabartë për të gjithë. /skyweb.al
