Heqja e masave të përkohshme për ndërprerjen e aksesit në platformën TikTok nuk ka sjellë asnjë ndryshim thelbësor në funksionimin e platformës në Shqipëri, ndërsa premtimet për rishikimin e algoritmeve rezultojnë ende të parealizuara.
Edhe pse qeveria flet për “rivlerësim institucional” dhe “dialog konstruktiv”, faktet tregojnë se Shqipëria nuk ka ende një marrëveshje konkrete me platformën.
Sipas shpjegimeve zyrtare, masa e miratuar nga Këshilli i Ministrave në mars 2025 u konceptua si ndërhyrje parandaluese për mbrojtjen e sigurisë publike, sociale dhe digjitale, me fokus të veçantë te fëmijët dhe të rinjtë. Qeveria argumenton se ndërprerja e aksesit shërbeu si mekanizëm presioni për të hapur dialog me TikTok dhe për të vendosur bazat e mekanizmave të rinj të sigurisë.
Megjithatë, pavarësisht rihapjes së platformës, autoritetet pranojnë se algoritmet mbeten të pandryshuara. Gjatë seancës së zhvilluar një ditë më parë në Gjykatën Kushtetuese, ku po shqyrtohet kushtetutshmëria e vendimit për mbylljen e TikTok një vit më parë, përfaqësuesi i qeverisë deklaroi se ende nuk ekziston një marrëveshje me platformën për rishikimin e algoritmeve.
Kjo deklaratë e bën të qartë se mbyllja njëvjeçare jo vetëm që ka qenë joefektive, por nuk ka prodhuar as rezultatin kryesor që u justifikua publikisht në atë kohë: Ndryshimin e mënyrës se si algoritmet shpërndajnë përmbajtjen problematike.
Paralelisht, autoritetet thonë se po përgatisin një plan komunikimi dhe ndërgjegjësimi të fokusuar te fëmijët, të rinjtë, prindërit dhe mësuesit, me synim edukimin digjital dhe përdorimin e sigurt të platformave online.
Në praktikë, megjithatë, situata mbetet e pandryshuar: TikTok-u është rihapur, algoritmet funksionojnë njësoj si më parë dhe marrëveshja e shumëpërfolur nuk ekziston.
Një vit mbyllje, shumë deklarata dhe pak rezultate konkrete. /skyweb.al
