Sipas një artikulli të publikuar nga e përditshmja italiane La Repubblica, qeveria shqiptare ka mohuar zërat për vendosjen e taksave të reja mbi pensionet e italianëve që jetojnë në Shqipëri.
Gazeta italiane shkruan se pas shqetësimeve të ngritura në komunitetin e pensionistëve italianë, autoritetet në Tiranë kanë sqaruar zyrtarisht se nuk ka asnjë plan për të ndryshuar regjimin aktual fiskal. Një përfaqësuese e qeverisë, keshilltare per mediat pranë Kryeministrisë ka theksuar se pensionet e huaja, përfshirë ato italiane, nuk do t’i nënshtrohen tatimit.
Aktualisht, pensionistët italianë që kanë transferuar rezidencën fiskale në Shqipëri përfitojnë nga përjashtimi nga tatimi mbi pensionet që marrin nga Italia. Ky regjim me tatim zero ka qenë një nga arsyet kryesore që ka nxitur shumë qytetarë italianë të zgjedhin Shqipërinë si vendbanim për vitet e pensionit.
Sipas La Repubblica, shqetësimet lindën pas interpretimeve të disa ndryshimeve të mëparshme ligjore në sistemin fiskal shqiptar, të cilat u perceptuan si një mundësi për vendosjen e një takse deri në 15 për qind mbi pensionet e huaja. Megjithatë, qeveria shqiptare ka sqaruar se këto interpretime janë të pasakta dhe se nuk parashikohet asnjë ndryshim në këtë drejtim.
Në vitet e fundit, Shqipëria është kthyer në një destinacion tërheqës për pensionistët italianë për shkak të kostos më të ulët të jetesës, klimës së favorshme dhe afërsisë me Italinë. Deklarata e fundit synon të qetësojë komunitetin italian dhe të konfirmojë vazhdimësinë e politikës aktuale fiskale. /skyweb.al
