Rreth 30 mijë individë kanë dorëzuar deri tani Deklaratën Individuale Vjetore të të Ardhurave për vitin 2025, ndërsa procesi vijon deri në afatin përfundimtar të 31 marsit 2026.
Shifrat e para tregojnë një interes më të lartë krahasuar me të njëjtën periudhë një vit më parë, në një proces që këtë herë pritet të përfshijë një bazë shumë më të gjerë tatimpaguesish.
Administrata tatimore parashikon që në total deklarimin ta plotësojnë rreth 200 mijë individë, një rritje e ndjeshme nga rreth 140 mijë që deklaruan për vitin 2024.
Zgjerimi i numrit lidhet kryesisht me hyrjen në fuqi të zbritjeve të reja tatimore dhe me aplikimin e përfitimeve që synojnë të nxisin deklarimin edhe nga ata që nuk e kanë detyrim ligjor.
Risia kryesore këtë vit lidhet me përfshirjen e zbritjeve për fëmijët në ngarkim dhe për shpenzimet arsimore. Përfitimi nuk kufizohet vetëm te individët me të ardhura mbi 1.2 milionë lekë në vit.
Edhe ata me të ardhura nën këtë prag, megjithëse nuk janë të detyruar të deklarojnë, mund ta bëjnë vullnetarisht për të përfituar rimbursim nëse pas përllogaritjes rezultojnë me tepricë tatimore.
Në praktikë, individët me të ardhura mbi 1.2 milionë lekë përfitojnë zbritje për numrin e fëmijëve në ngarkim, ndërsa ata me të ardhura nën këtë nivel mund të përfitojnë, përveç kësaj, edhe zbritje për shpenzimet arsimore të dokumentuara.
Sipas administratës tatimore, subjekt i detyrimit për deklarim janë të gjithë individët që gjatë vitit 2025 kanë realizuar të ardhura bruto vjetore 1.2 milionë lekë ose më shumë nga çdo burim, jo vetëm nga paga.
Detyrimi vlen gjithashtu për personat që kanë qenë të punësuar në më shumë se një marrëdhënie pune për të paktën një muaj gjatë vitit, si edhe për ata që kanë siguruar të ardhura mbi 50 mijë lekë për të cilat nuk është mbajtur tatim, si për shembull të ardhurat nga qiratë apo platformat online.
Administrata thekson se afati i deklarimit dhe i çdo detyrimi të lidhur me të mbetet 31 marsi 2026, ndërsa qëllimi i ndryshimeve është rritja e korrektësisë fiskale dhe zgjerimi i përfitimeve për individët që deklarojnë të ardhurat në mënyrë të plotë./skyweb.al
