Gjatë muajit janar, Inspektorati Shtetëror i Punës dhe Shërbimeve Shoqërore ka intensifikuar kontrollet në tregun e punës, duke realizuar 667 inspektime në subjekte të ndryshme me fokus zbatimin e detyrimeve ligjore nga punëdhënësit dhe mbrojtjen e të drejtave të punonjësve.
Sipas të dhënave zyrtare, janë verifikuar 12 769 vende pune, ndërsa paralelisht janë zhvilluar 130 inspektime këshilluese, të orientuara drejt parandalimit të shkeljeve dhe përmirësimit të standardeve të sigurisë dhe shëndetit në punë.
Nga kontrollet e kryera janë konstatuar shkelje të legjislacionit, për të cilat janë vendosur 445 masa administrative, kryesisht për çështje që lidhen me formalizimin e marrëdhënieve të punës, respektimin e kontratave dhe kushtet e sigurisë në ambientet e punës.
Gjatë të njëjtës periudhë janë trajtuar edhe 90 ankesa të depozituara nga qytetarë dhe punonjës, duke aktivizuar procedurat institucionale për verifikimin e rasteve të raportuara.
Ndërkohë, përgjatë vitit 2025 Inspektorati ka inspektuar 9 532 subjekte, ku 8 086 kontrolle janë kryer mbi bazë risku, 963 për shkak ankese, ndërsa janë vendosur 1 269 pezullime aktiviteti, 4 191 paralajmërime dhe 268 gjoba.
Si rezultat i kontrolleve, 98 për qind e punëmarrësve të konstatuar informalë janë formalizuar, janë deklaruar 2 538 punonjës të rinj dhe në buxhetin e shtetit kontribuojnë rreth 28.3 milionë lekë në muaj nga sigurimet shoqërore dhe shëndetësore. /skyweb.al
