Ministrja e Ekonomisë dhe Inovacionit, Delina Ibrahimaj, prezantoi këtë të martë Dashnor Sula në detyrën e Kryeinspektorit të Përgjithshëm, në krye të Inspektorati Qendror.
Gjatë fjalës së saj, ministrja vlerësoi kontributin shumëvjeçar të ish-kryeinspektorit Hajdari, duke theksuar se reforma në sistemin e inspektimeve është një proces i nisur prej vitesh, i cili tashmë ka hyrë në një fazë të re zbatimi pas miratimit të ligjit të ri “Për inspektimet”.
Sipas Ibrahimajt, Inspektorati i Përgjithshëm ka një rol kyç si institucioni koordinues i gjithë sistemit të inspektimeve, në një sektor që vijon të përballet me sfida strukturore dhe nevojë për përmirësim të vazhdueshëm. Ajo theksoi se vizioni i qeverisë në mandatin e ri është që biznesi ta shohë shtetin si partner dhe jo si pengesë.
“Inspektimet nuk duhet të kenë logjikën e ndëshkimit, por atë të përmirësimit, duke synuar përmbushjen sa më të mirë të legjislacionit dhe rritjen e cilësisë së shërbimeve dhe produkteve në treg”, u shpreh ministrja.
Në lidhje me përmbajtjen e reformës, Ibrahimaj nënvizoi se ligji i ri parashikon masa rekomanduese si hap të parë, përpara penaliteteve, si dhe ndarje të qartë funksionesh për të shmangur konfliktin e interesit në vendosjen dhe shqyrtimin e gjobave. Këto procese tashmë administrohen nga Inspektorati i Përgjithshëm, duke i dhënë zbatim konkret reformës.
Një tjetër shtyllë kryesore esht profesionalizimi i trupës së inspektorëve përmes një sistemi të qëndrueshëm rekrutimi dhe trajnimi, si dhe ndërtimi i sistemeve të bazuara në analizë risku dhe digjitalizim, me qëllim rritjen e transparencës dhe forcimin e besueshmërisë së institucioneve inspektuese.
Në këtë kuadër, ministrja shprehu besimin se përvoja administrative dhe politike e Dashnor Sulës do të kontribuojë në përmbylljen e reformës dhe në forcimin e marrëdhënies shtet-biznes, në përputhje me standardet europiane.
Nga ana e tij, Kryeinspektori i Përgjithshëm Dashnor Sula falënderoi për besimin dhe theksoi se përkushtimi, integriteti dhe drejtësia do të jenë parimet udhëheqëse të punës së tij. Ai vuri në dukje rëndësinë e respektimit të biznesit të ndershëm, forcimit të sistemeve dhe bashkëpunimit institucional për të garantuar një sistem inspektimesh të drejtë, transparent dhe efektiv.
Ministrja Ibrahimaj theksoi se viti në vijim do të jetë vendimtar për përmbylljen e reformës së inspektimeve, riorganizimin e inspektorateve dhe funksionalizimin e plotë të sistemeve të reja në shërbim të bizneseve dhe qytetarëve. /skyweb.al
