Politikat kryesore për luftimin e obezitetit në fëmijëri janë fokusuar tradicionalisht te promovimi i ushqyerjes së shëndetshme dhe aktivitetit fizik. Megjithatë, pavarësisht përpjekjeve të vazhdueshme ndër vite, përqindja e fëmijëve mbipeshë ose obezë mbetet e lartë.
Një studim i publikuar në revistën shkencore Pediatrics sugjeron se një faktor i rëndësishëm, shpesh i nënvlerësuar, mund të jetë vetë sjellja e prindërve, pra mënyra se si ata përballojnë stresin.
Sipas studimit, fëmijët e prindërve që morën pjesë në programe për menaxhimin e stresit zhvilluan zakone më të shëndetshme dhe arritën të mbajnë peshën e tyre të qëndrueshme. Autorja kryesore e studimit, Rajita Sinha nga Yale University, theksoi se përmirësimi i mënyrës si prindërit menaxhojnë stresin reflektohet drejtpërdrejt në sjelljen e tyre ndaj fëmijëve dhe ul rrezikun për obezitet.
Studime të mëparshme kanë treguar se prindërit e stresuar kanë më shumë gjasa të braktisin zgjedhjet e shëndetshme ushqimore dhe t’i drejtohen ushqimeve të shpejta, duke ndikuar kështu edhe në preferencat ushqimore të fëmijëve të tyre.
Për të analizuar më thellë këtë lidhje, studiues nga Yale University dhe institucione të tjera amerikane zhvilluan një eksperiment me 114 prindër që kishin fëmijë të moshës 2-5 vjeç, të cilët ishin mbipeshë ose obezë. Studimi përfshiu pjesëmarrës nga shtresa të ndryshme socio-ekonomike.
Gjatë një periudhe 12-javore, prindërit u ndanë në dy grupe:
–Grupi i parë mori këshilla për ushqyerje të shëndetshme dhe njëkohësisht ndoqi një program për reduktimin e stresit, ku u mësuan teknika të vetërregullimit dhe ndërgjegjësimit (mindfulness).
-Grupi i dytë mori vetëm këshilla ushqimore.
Çdo javë, prindërit dhe fëmijët e tyre monitoroheshin për nivelet e stresit dhe ndryshimet në peshë. Studiuesit vëzhguan gjithashtu ndërveprimet prind-fëmijë, duke analizuar elementë si ngrohtësia, pozitiviteti dhe durimi.
Rezultatet treguan një diferencë të qartë. Fëmijët e prindërve që morën trajnim për menaxhimin e stresit reduktuan konsumimin e ushqimeve jo të shëndetshme dhe ruajtën një peshë të qëndrueshme. Në të kundërt, fëmijët e grupit tjetër kishin gjashtë herë më shumë gjasa të shtonin në peshë.
Kjo diferencë mbeti e dukshme edhe tre muaj pas përfundimit të studimit, duke sugjeruar se ndërhyrjet në menaxhimin e stresit mund të kenë efekte afatgjata.
Sipas studiuesve, kombinimi i teknikave të ndërgjegjësimit dhe vetërregullimit me ushqyerjen e shëndetshme dhe aktivitetin fizik mund të mbrojë fëmijët e vegjël nga ndikimet negative të stresit në shtimin e peshës.
Megjithëse kampioni i studimit ishte relativisht i vogël, priten rezultate nga një kërkim më i gjerë dy-vjeçar për të konfirmuar këto gjetje. Edhe nëse rezultatet ndryshojnë, ekspertët theksojnë se reduktimi i stresit te prindërit ka potencial të sjellë përfitime të shumta për mirëqenien e fëmijëve.
