Shteti i vogël afrikan Eswatini, i njohur më parë si Swaziland dhe i rrethuar plotësisht nga Afrika e Jugut, ka nisur zyrtarisht përdorimin e një ilaçi të ri për parandalimin e infeksionit me HIV, të quajtur lenacapavir, raporton Reuters.
Sipas autoriteteve, rreth 2 000 qytetarë kanë marrë këtë injeksion që nga dhjetori i kaluar. Ilaçi është tashmë në përdorim edhe në Shtetet e Bashkuara, ku është zhvilluar, si dhe në disa vende të tjera afrikane.
“Reagimi ka qenë shumë pozitiv”, deklaroi Sindy Matse, përfaqësuese e programit kombëtar kundër AIDS-it në vend.
I prodhuar nga kompania amerikane Gilead Sciences, lenacapavir është një injeksion nënlëkuror që merret vetëm dy herë në vit. Ai synon të shmangë vështirësitë që lidhen me përdorimin e përditshëm të tabletave PrEP, si harresa e dozave apo mungesa e vazhdueshme e ilaçeve.
Sipas Matse, objektivi është që ky trajtim të bëhet i disponueshëm në të gjitha 206 qendrat shëndetësore që aktualisht ofrojnë terapi parandaluese PrEP.
Të dhënat e fundit nga Centers for Disease Control and Prevention tregojnë se rreth një e katërta e popullsisë së moshës 15–49 vjeç në Eswatini jeton me HIV. Megjithatë, rastet e reja të infeksionit kanë rënë ndjeshëm, nga rreth 14 000 në vitin 2010 në afro 4 000 në vitin 2024, falë përmirësimeve në parandalim dhe trajtim. /skyweb.al
