Grupet më të mëdha europiane si Lufthansa dhe Air France kanë zgjatur pezullimin e fluturimeve drejt disa prej destinacioneve kryesore në rajon, duke përmendur rreziqet e sigurisë dhe mbylljen e hapësirave ajrore .
Lufthansa Group ka ndalur fluturimet drejt Dubait dhe Tel Avivit deri në fund të majit, ndërsa për destinacione si Abu Dhabi, Amman, Bejrut, Riad, Erbil, Muscat dhe Teheran pezullimi shkon deri në 24 tetor.
Edhe Eurowings, pjesë e grupit, ka ndërprerë fluturimet drejt disa prej këtyre qyteteve për periudha të gjata .
Air France ka kufizuar operimet drejt Dubait dhe Riadit deri në fund të marsit, ndërsa fluturimet për Tel Aviv dhe Bejrut janë pezulluar deri në fillim të prillit, duke theksuar se situata po monitorohet në kohë reale.
Ndërkohë, KLM ka ndaluar fluturimet mbi hapësirat ajrore të Iranit, Irakut dhe Izraelit, duke anuluar ose riorganizuar të gjitha itineraret që kalojnë në këtë rajon.
British Airways ka anuluar fluturimet drejt Ammanit, Bahreinit, Dubait dhe Tel Avivit deri në fund të majit, ndërsa fluturimet drejt Dohas mbeten të pezulluara deri në fund të prillit .
Cathay Pacific ka zgjatur pezullimin e fluturimeve drejt Dubait dhe Riadit deri në 31 maj, ndërsa paralelisht po shton fluturimet drejt Europës për të përballuar kërkesën në rritje nga pasagjerët që shmangin Lindjen e Mesme.
Transportuesit nga Gjiri si Emirates, Etihad dhe Air Arabia vijojnë operimet me kapacitete të reduktuara dhe orare të kufizuara, duke paralajmëruar pasagjerët për ndryshime të vazhdueshme dhe nevojën për verifikim të statusit të fluturimeve.
Qatar Airways po operon një grafik të reduktuar deri në fund të marsit, ndërsa Turkish Airlines ka anuluar një pjesë të fluturimeve drejt një liste të gjatë vendesh në rajon, përfshirë Iranin, Irakun, Libanin dhe vendet e Gjirit.
Edhe kompani të tjera ndërkombëtare si Air Canada, Philippine Airlines, Garuda Indonesia dhe Virgin Atlantic kanë pezulluar ose kufizuar fluturimet drejt destinacioneve në Lindjen e Mesme, ndërsa Air India vijon operimet me një kombinim fluturimesh të planifikuara dhe të posaçme, në varësi të kushteve në terren .
Për shkak të mbylljes së hapësirave ajrore dhe devijimeve të detyruara, fluturimet po zgjasin më shumë dhe kostot për kompanitë ajrore janë rritur ndjeshëm, duke përfshirë rritjen e konsumit të karburantit dhe uljen e kapaciteteve operative.
Në këto kushte, industria e aviacionit po përballet me një nga goditjet më të forta që nga periudha e pandemisë, ndërsa pasiguria mbetet e lartë në prag të sezonit të ngarkuar të pranverës dhe verës. /skyweb.al
