Qeveria ka nisur më në fund miratimin e akteve nënligjore për rikthimin e lojërave të fatit, dy vite pas miratimit të ligjit përkatës. Këshilli i Ministrave miratoi vendimin që përcakton kriteret, procedurat dhe metodologjinë e pikëzimit për dhënien e licencave në kategorinë e basteve sportive online.
Sipas vendimit, aplikimet do të vlerësohen mbi bazën e pesë kritereve kryesore, ku oferta ekonomike dhe përvoja në fushën e lojërave të fatit mbajnë peshën më të madhe me nga 30 pikë secila. Kapacitetet organizative dhe administrative vlerësohen me 20 pikë, ndërsa kapacitetet teknologjike dhe certifikimet ndërkombëtare me 15 pikë. Plani i biznesit për aktivitetin online ka një peshë më të ulët prej 5 pikësh. Në total, çdo aplikim mund të marrë deri në 100 pikë.
Procedura konkurruese do të organizohet nga Autoriteti i Mbikëqyrjes së Lojërave të Fatit dhe Komisioni i Licencave. Thirrja për konkurrim do të publikohet në faqen zyrtare të AMLF-së, në dy gazeta ndërkombëtare dhe në Buletinin e Njoftimeve Publike. Subjektet e interesuara, të regjistruara si shoqëri aksionare, do të kenë 45 ditë kohë për të dorëzuar aplikimet.
Pas verifikimit dhe vlerësimit të dokumentacionit, Komisioni i Licencave do të rendisë aplikantët sipas pikëve dhe do të shpallë fituesin. Në rast ankese, Ministri i Financave parashikohet të krijojë një komision të posaçëm për shqyrtimin e tyre.
Vendimi hyn në fuqi pas botimit në Fletoren Zyrtare dhe ngarkon Ministrinë e Financave, Autoritetin e Mbikëqyrjes së Lojërave të Fatit dhe Komisionin e Licencimit për zbatimin e tij. /skyweb.al
