Presidenti i Republikës, Bajram Begaj, priti sot Kryetarin e Parlamentit të Maqedonisë së Veriut, Afrim Gashi, në një takim ku në fokus ishin marrëdhëniet mes dy vendeve dhe çështjet që lidhen me shqiptarët në shtetin fqinj.
Gjatë bisedës u diskutuan marrëdhëniet e miqësisë dhe bashkëpunimit, si dhe problematikat që hasin shqiptarët në Maqedoninë e Veriut, me theks te përdorimi i gjuhës shqipe, përfaqësimi i drejtë dhe adekuat në institucione dhe nevoja për një qëndrim të bashkuar të faktorit politik shqiptar për mbrojtjen e të drejtave të tyre.
Presidenti Begaj u shpreh qartë se ligji për përfaqësimin adekuat dhe Marrëveshja e Ohrit nuk janë për diskutim, por për zbatim, duke nënvizuar rëndësinë e respektimit të tyre në praktikë.
Kreu i Shtetit kërkoi gjithashtu angazhimin e Kryeparlamentarit Gashi për zgjidhjen e kërkesave të studentëve të Jurisprudencës, të cilët kërkojnë të japin provimet në gjuhën shqipe.
“Unë uroj që studentëve që protestojnë për dhënien e provimit në gjuhën shqipe t’u lejohet kjo e drejtë dhe të rregullohet ky mekanizëm në mënyrë ligjore e të drejtë”, u shpreh Presidenti Begaj.
Ai theksoi se shqiptarët janë faktor shtetformues në Maqedoninë e Veriut dhe se në një shtet multietnik bashkëjetesa dhe mirëkuptimi ndërmjet etnive janë thelbësore.
Sipas tij, garantimi institucional i të drejtave të fituara përmes një kuadri ligjor detyrues, dhe jo si rezultat i balancave të përkohshme politike, është një garanci për avancimin real të vendit drejt integrimit në Bashkimin Europian.
Në takim u diskutua edhe fuqizimi i diasporës shqiptare, të cilën Presidenti Begaj e cilësoi si “fuqia dhe zemra e kombit”.
