Zjarri i ndodhur në zonën e “Farmacia 10” në Tiranë ka rikthyer në vëmendje rreziqet reale që kërcënojnë jetën dhe pronën e qytetarëve, ndërsa institucionet e tregut të sigurimeve kërkojnë më shumë ndërgjegjësim dhe informim të saktë.
Në një deklaratë zyrtare, Shoqata e Siguruesve të Shqipërisë e cilëson këtë ngjarje si një alarm serioz, duke theksuar se raste të tilla nuk janë të rralla dhe kërkojnë masa konkrete për mbrojtje financiare.
Sipas saj, sigurimi i pronës mbetet një nga instrumentet më të rëndësishëm për të përballuar pasojat ekonomike të situatave të tilla, si për familjet ashtu edhe për bizneset.
Reagimi vjen edhe në një moment kur, sipas Shoqatës, në hapësirën publike po qarkullojnë interpretime të pasakta nga persona të cilësuar si “ekspertë”, të cilat krijojnë perceptimin se sigurimi nuk funksionon ose se dëmshpërblimi është i pamundur në rast zjarri.
Shoqata i konsideron këto qëndrime si të gabuara dhe të papërgjegjshme, duke paralajmëruar se ato rrezikojnë të dezinformojnë qytetarët dhe të dëmtojnë drejtpërdrejt interesin e tyre.
Për sqarim, ajo thekson se në kushtet standarde të sigurimit nga zjarri, mbulimi lidhet me pasojën e ngjarjes dhe jo me klasifikimin teknik të shkakut. Kjo do të thotë se edhe në rastet kur zjarri shkaktohet nga defekte elektrike apo burime të tjera aksidentale, dëmet dëmshpërblehen sipas kontratës së sigurimit.
Çdo kërkesë për dëmshpërblim, sipas deklaratës, trajtohet mbi bazën e fakteve dhe të drejtave kontraktuale, duke garantuar një proces të drejtë dhe transparent.
Megjithatë, Shoqata thekson se sigurimi nuk zëvendëson detyrimin për respektimin e standardeve teknike dhe të sigurisë, por funksionon si një shtresë shtesë mbrojtjeje financiare në momentet kur rreziku materializohet.
Në kushtet e zhvillimit të shpejtë urban dhe rritjes së rreziqeve, ajo bën thirrje për më shumë ndërgjegjësim dhe informim profesional të publikut, duke kërkuar që qytetarët të mos bien pre e keqinformimit dhe të mbështeten në burime të besueshme.
“Sigurimi nuk e ndalon ngjarjen, por garanton që pasojat e saj të mos jenë shkatërruese për familjet dhe ekonominë e tyre”, thuhet në deklaratë./skyweb.al
