Pyetja e parë: A është makina gati për vapën?
Ekspertët paralajmërojnë se vera është periudha kur makinat pësojnë më shpesh defekte mekanike. Temperaturat e asfaltit në rajon mund të kalojnë 60 gradë Celsius, duke rënduar sistemin e ftohjes, baterinë, gomat dhe motorin. Probleme të vogla që janë neglizhuar gjatë pranverës mund të shpërthejnë pikërisht gjatë një udhëtimi të gjatë drejt plazhit.
Shumë shoferë nisen për pushime pa kontrolluarvajin, frenat apo gjendjen e gomave. Pikërisht këto janë ndër arsyet më të zakonshme pse automjetet mbeten të bllokuara në autostradat drejt Greqisë apo në rrugët e jugut të Shqipërisë gjatë sezonit turistik.
Pyetja e dytë: Çfarë ndodh nëse makina prishet larg zonave të banuara?
Në kulmin e sezonit veror, ndihma rrugore shpesh vonohet për shkak të fluksit të madh të automjeteve. Në zonat turistike apo rrugët e izoluara, pritja për karrotrec mund të zgjasë me orë të tëra, ndërsa kostot rriten ndjeshëm.
Problemi bëhet edhe më i madh për ata që udhëtojnë me makina të mbingarkuara, me rimorkio apo karavanë. Temperaturat e larta dhe pesha shtesë rrisin ndjeshëm rrezikun e çarjes së gomave dhe mbinxehjes së motorit, sidomos në rrugët malore të Ballkanit.
Pyetja e tretë: A e mbulon siguracioni një defekt mekanik?
Shumë drejtues mendojnë gabimisht se siguracioni i makinës mbulon çdo problem gjatë udhëtimit. Në realitet, shumica e policave mbulojnë aksidentet, por jo defektet mekanike që vijnë nga konsumimi, temperaturat e larta apo mungesa e mirëmbajtjes. Prandaj duhet marrë në konsideratë edhe një policë sigurimi që mbulon defektet teknike dhe jo vetëm kartoni jeshil.
Për këtë arsye, specialistët rekomandojnë që para çdo udhëtimi veror të bëhet një kontroll i plotë teknik i automjetit dhe të lexohet me kujdes mbulimi i siguracionit, pasi një problem i vogël në vapën e verës mund të kthehet shumë shpejt në një faturë të kushtueshme pushimesh. /skyweb.al
