Një zhvillim i ri në fushën e onkologjisë po ngjall optimizëm tek mjekët dhe pacientët, pasi një ilaç eksperimental ka treguar rezultate shumë premtuese në luftën kundër kancerit të pankreasit, një nga format më agresive dhe vdekjeprurëse të sëmundjes, shkruan Reuters.
Sipas të dhënave të prezantuara në takimin vjetor të Shoqatës Amerikane të Onkologjisë Klinike (ASCO), ilaçi i ri daraxonrasib ka arritur të zgjasë ndjeshëm mbijetesën e pacientëve me kancer të avancuar të pankreasit, duke u konsideruar nga ekspertët si një nga përparimet më të rëndësishme të viteve të fundit në këtë fushë.
Studimi përfshiu qindra pacientë me sëmundje të përhapur, të cilët kishin kaluar më parë trajtime të tjera. Rezultatet treguan se pacientët që morën terapinë e re jetuan mesatarisht rreth 13.2 muaj, krahasuar me 6.7 muaj tek ata që trajtoheshin vetëm me kimioterapi standarde.
Ilaçi vepron duke bllokuar proteinat RAS, të lidhura me mutacionin gjenetik KRAS, i cili gjendet në mbi 90% të rasteve të kancerit të pankreasit. Për dekada me radhë, ky mutacion është konsideruar pothuajse i patrajtueshëm, duke kufizuar ndjeshëm mundësitë terapeutike për pacientët.
Ekspertët paralajmërojnë se, megjithëse rezultatet janë shumë inkurajuese, ilaçi nuk përbën ende një kurë përfundimtare dhe nevojiten studime të mëtejshme për të konfirmuar efektivitetin dhe sigurinë e tij në shkallë më të gjerë. Megjithatë, shumë specialistë e konsiderojnë këtë zhvillim si fillimin e një epoke të re në trajtimin e kancerit të pankreasit.
Kanceri i pankreasit mbetet një nga tumoret me prognozën më të rëndë, me norma të ulëta mbijetese dhe me pak alternativa efektive trajtimi. Pikërisht për këtë arsye, çdo hap përpara në kërkimin shkencor shihet si një mundësi e re për mijëra pacientë në mbarë botën /skyweb.al
