Shqipëria po tërheq gjithnjë e më shumë vëmendjen e mediave ndërkombëtare si një prej destinacioneve turistike më interesante të Europës. Këtë herë është “Toronto Star” që i kushton një reportazh vendit tonë, duke vënë në qendër transformimin nga izolimi i periudhës komuniste në një destinacion që po tërheq turistë nga e gjithë bota.
“Dikur një shtet i izoluar, i shkëputur nga bota, sot ky vend është një nga destinacionet më të përfolura të Europës”, shkruan gazeta kanadeze në titullin e reportazhit të publikuar më 21 gusht.
Autori Tim Johnson thekson se Shqipëria ka dalë nga “hija e Luftës së Ftohtë”, ndërsa bukuritë natyrore dhe kultura e saj komplekse po tërheqin gjithnjë e më shumë vëmendje ndërkombëtare.
Reportazhi nis me një udhëtim me makinë nëpër Shqipëri dhe me kontrastet e forta të peizazhit. Johnson përshkruan zbritjen nga shpatet e Alpeve Shqiptare, të njohura edhe si “Bjeshkët e Namuna”, për të mbërritur më pas pranë brigjeve të Detit Jon.
Veçanërisht mbresëlënës për gazetarin është bregdeti shqiptar. Teksa i afrohet vijës bregdetare, ai e përshkruan ngjyrën e ujit si një blu të jashtëzakonshme, “sikur të ishte nxjerrë nga një ëndërr jashtëzakonisht e kthjellët”.
Një pjesë e reportazhit zhvillohet në Himarë, ku Johnson hipën në një varkë të vogël për të eksploruar bregdetin. Ai sjell edhe përshkrimin e Aris Goros nga “Himara Sea Escapes”, i cili, duke iu referuar qetësisë së detit, thotë se në zonë uji përshkruhet si “i lëmuar si vaj ulliri”.
Në fokus të shkrimit është pikërisht kontrasti mes të kaluarës së Shqipërisë, si një prej vendeve më të izoluara të Europës, dhe imazhit të sotëm të një destinacioni në rritje, që po bëhet gjithnjë e më popullor mes udhëtarëve ndërkombëtarë.
“Toronto Star” e lidh këtë interes në rritje me kombinimin e rivierës shqiptare, Alpeve, peizazheve të ndryshme dhe historisë së veçantë të vendit, elementë që sipas gazetës po e kthejnë Shqipërinë në një nga destinacionet më të diskutuara të momentit në Europë. /skyweb.al
