Komisionerja e Bashkimit Evropian për Zgjerimin, Marta Kos, deklaroi se Shqipëria duhet të shfuqizojë ligjin për investimet strategjike dhe ndryshimet e vitit 2024 në ligjin për zonat e mbrojtura, si pjesë e kushteve për përmbylljen e procesit të integrimit në BE.
Gjatë Konferencës së nëntë Ndërqeveritare Shqipëri–Bashkimi Evropian, Kos bëri të ditur se marrëveshja mes palëve ishte arritur përpara nisjes së protestave në vend.
“Përpara se të nisnin protestat, kishim rënë dakord me Shqipërinë që përgjatë këtij viti të shfuqizoheshin ndryshimet në ligjin e vitit 2024 për zonat e mbrojtura dhe ligji për investimet strategjike”, deklaroi ajo.
Sipas komisioneres, këto ndryshime janë të domosdoshme për përmbushjen e kritereve të anëtarësimit dhe lidhen drejtpërdrejt me Kapitullin 27 të negociatave, i cili mbulon çështjet e mjedisit.
“Këto ndryshime duhet të bëhen për të përmbyllur procesin e integrimit në BE”, tha Kos, duke i kërkuar qeverisë shqiptare që të veprojë sa më shpejt.
Ajo theksoi se mbrojtja e mjedisit është një nga kushtet bazë për anëtarësimin dhe se Shqipëria duhet të ndryshojë një sërë ligjesh për t’u përafruar me standardet evropiane.
Kos sqaroi se rruga e Shqipërisë drejt BE-së nuk konsiderohet në rrezik, duke përmendur si provë mbylljen e tre kapitujve të parë të negociatave.
Megjithatë, deklarata e saj e bën të qartë se përparimi i mëtejshëm në proces do të varet edhe nga heqja e dy ligjeve të kundërshtuara.
Komisionerja foli edhe për protestat, të cilat i cilësoi pjesë të demokracisë dhe të proceseve pluraliste.
Ajo i bëri thirrje qeverisë shqiptare që të dëgjojë qytetarët dhe të marrë në konsideratë kërkesat e tyre.
