Qeveria ka miratuar një vendim të ri që përcakton procedurat për pezullimin ose revokimin e licencave të operatorëve që ushtrojnë aktivitetin e basteve sportive online në Shqipëri.
Vendimi vjen në një kohë kur tregu i basteve online është rikthyer zyrtarisht, ndërsa institucionet po vendosin rregullat për mënyrën se si do të kontrollohen operatorët e licencuar.
Sipas aktit të miratuar, masat administrative do të zbatohen ndaj subjekteve që nuk përmbushin kriteret bazë të licencimit, nuk ngurtësojnë fondin e garancisë, përsërisin shkeljet ligjore, nuk shlyejnë detyrimet ndaj Autoritetit të Mbikëqyrjes së Lojërave të Fatit ose ndaj fituesve të lojës.
Procedurat për pezullim ose revokim licence do të nisin nga AMLF ose nga Komisioni i Licencave, në varësi të shkeljes së konstatuar.
Pas kontrolleve, inspektimeve dhe shqyrtimit të dokumentacionit, Komisioni i Licencave mund t’i propozojë ministrit përgjegjës për Financat marrjen e masës përkatëse.
Vendimi përfundimtar për pezullimin ose heqjen e licencës do të merret me urdhër të arsyetuar nga ministri.
Operatorët do të kenë të drejtë të njoftohen për procedurën, të marrin pjesë në seanca dëgjimore dhe të paraqesin shpjegimet e tyre përpara marrjes së vendimit.
Sipas vendimit, licenca mund të pezullohet për një periudhë nga 30 ditë deri në plotësimin e kushteve të kërkuara, por jo më shumë se dy vjet.
Gjatë kohës së pezullimit, operatori nuk lejohet të ushtrojë aktivitetin e basteve sportive online dhe duhet të zbatojë detyrimet e përcaktuara në urdhrin e ministrit.
Akti parashikon edhe ngritjen e një komisioni AD-HOC pranë Ministrisë së Financave, i cili do të shqyrtojë praktikat e propozuara për pezullim ose revokim licence.
Ndërkohë, AMLF do të monitorojë zbatimin e urdhrave dhe respektimin e kushteve nga operatorët.
Subjektet që preken nga këto masa do të kenë të drejtë ta ankimojnë vendimin në gjykatën kompetente.
Vendimi hyn në fuqi 15 ditë pas botimit në Fletoren Zyrtare.
