Italia po kalon fazën më intensive të valës së tretë të të nxehtit për këtë vit, ndërsa temperaturat pritet të arrijnë deri në 45 gradë Celsius në Sardini. Kushtet e zgjatura të thatësirës kanë përkeqësuar situatën, duke shkaktuar edhe mungesa të ujit në disa zona.
Sipas agjencisë së lajmeve ANSA, autoritetet italiane kanë zgjeruar sistemin e alarmit për temperaturat ekstreme, duke paralajmëruar për kushte të rrezikshme në pjesën qendrore dhe jugore të vendit.
Numri i qyteteve të vendosura nën alarmin maksimal të kuq po rritet. Pas dy qyteteve të përfshira të hënën, numri i tyre ka arritur në katër të martën, ndërsa deri të mërkurën pritet që shtatë qytete të jenë në nivelin më të lartë të rrezikut.
Meteorologët parashikojnë temperatura që do të luhaten nga 39 deri në 41 gradë Celsius në shumë rajone të Italisë qendrore dhe jugore. Në Sardini, termometri pritet të shënojë deri në 45 gradë Celsius deri të premten.
Meteorologu Federico Brescia deklaroi se vala e të nxehtit do ta ngrejë nivelin e ngrirjes mbi 5.000 metra mbi nivelin e detit, duke e cilësuar këtë fenomen si një ngrohje “të jashtëzakonshme”.
Ndërkohë, Firence ndodhet nën alarmin e kuq që prej 8 korrikut dhe autoritetet presin që ky nivel maksimal rreziku të mbetet në fuqi të paktën deri të mërkurën.
