Dollari amerikan e ka nisur javën në rritje të lehtë, duke shënuar një përmirësim të kursit të këmbimit krahasuar me fundjavën. Mëngjesin e sotëm, ai blihet me 81.2 lekë dhe shitet me 82.2 lekë, duke reflektuar një forcim modest në raport me javën e kaluar.
Edhe euro ka ruajtur një ecuri të qëndrueshme, pa luhatje të ndjeshme në vlerë. Sipas kursit të këmbimit, monedha europiane blihet sot me 93.1 lekë dhe shitet me 93.9 lekë, duke mbetur pothuajse në të njëjtat nivele si një javë më parë.
Franga zvicerane ka regjistruar gjithashtu një rritje të lehtë të kuotës. Në tregun vendas valutor, ajo blihet këtë mëngjes me 100.5 lekë dhe shitet me 101.7 lekë, duke shënuar një forcim në krahasim me javën e kaluar.
Në të njëjtën linjë është edhe paundi britanik, i cili e ka nisur javën me një rritje të lehtë të vlerës. Sipas kursit të këmbimit në tregun e brendshëm, paundi blihet sot me 109.2 lekë dhe shitet me 110.4 lekë, duke qenë më i fortë se një javë më parë.
