Rritja e kërkesës për punonjës dhe vështirësitë për të gjetur fuqi punëtore duket se po detyrojnë kompanitë e ndërtimit të rrisin pagat.
Sipas të dhënave të INSTAT-it për tremujorin e dytë 2026, ndërtimi ka shënuar rritjen më të madhe të pagës mesatare ndër të gjitha aktivitetet ekonomike në Shqipëri. Krahasuar me të njëjtën periudhë të vitit të kaluar, pagat në këtë sektor janë rritur me 22,1%.
Rritja është më shumë se dyfishi i ritmit të regjistruar në rang kombëtar. Paga mesatare mujore bruto në vend arriti në 92.150 lekë, duke u rritur me 9,8% në krahasim me tremujorin e dytë 2025.
Të njëjtën prirje tregojnë edhe të dhënat sipas profesioneve. Pagat e zejtarëve, artizanëve dhe profesioneve të lidhura me ta janë rritur me 16%, ritmi më i lartë ndër grupet profesionale.
Pas tyre renditen punëtorët e profesioneve elementare, pagat e të cilëve janë rritur me 15,1% brenda një viti.
Këto kategori përfshijnë një pjesë të konsiderueshme të fuqisë punëtore që përdoret në kantieret e ndërtimit dhe në punët fizike. Rritja e pagave mund të lidhet me kërkesën e lartë për punonjës, emigracionin dhe vështirësitë e kompanive për të gjetur zejtarë e krah pune.
Megjithatë, INSTAT nuk jep një shpjegim zyrtar për arsyet e rritjes dhe publikon vetëm ndryshimin e pagave të deklaruara.
Në anën tjetër të renditjes qëndrojnë aktivitetet e artit, argëtimit, çlodhjes dhe shërbimeve të tjera, ku paga mesatare është rritur vetëm me 6,4%, niveli më i ulët ndër aktivitetet ekonomike.
Edhe pse ndërtimi kryeson për ritmin e rritjes, ai nuk rezulton sektori me pagën më të lartë. Këtë renditje e udhëheqin aktivitetet financiare dhe të sigurimit, me pagë mesatare 187.267 lekë, të ndjekura nga informacioni dhe komunikacioni me 143.528 lekë.
Të dhënat tregojnë se konkurrenca për punëtorë po ushtron presion mbi kompanitë e ndërtimit. Në një treg ku gjetja e fuqisë së kualifikuar është bërë më e vështirë, paga po kthehet në instrumentin kryesor për të tërhequr dhe mbajtur punonjësit. /skyweb.al
