Bizneset që kryejnë shitje me para në dorë duhet të pajisen me terminal POS/POI në çdo pikë shitjeje brenda datës 31 dhjetor 2026.
Administrata Tatimore bëri të ditur se afati zbatohet për tatimpaguesit që nuk përfshihen në kategoritë për të cilat janë vendosur afate më të hershme.
Detyrimi parashikohet në nenin 59/3 të ligjit “Për procedurat tatimore në Republikën e Shqipërisë” dhe synon zgjerimin e mundësive për pagesa elektronike.
Megjithatë, ligji parashikon disa përjashtime. Terminali POS/POI nuk do të jetë i detyrueshëm për bizneset që ushtrojnë aktivitet në zona pa mbulim me internet.
Përjashtohen gjithashtu tatimpaguesit që, sipas legjislacionit për fiskalizimin, nuk kanë detyrim të lëshojnë faturë.
Detyrimi nuk zbatohet as për të vetëpunësuarit e vetëm, kur përmbushin njëkohësisht disa kushte: nuk janë subjekt i TVSH-së, paguajnë tatimin mbi të ardhurat personale nga biznesi dhe nuk kanë më shumë se një vendndodhje ku ushtrojnë aktivitetin.
Sipas Administratës Tatimore, përdorimi i terminaleve do të lehtësojë pagesat e klientëve dhe do t’u mundësojë bizneseve të ofrojnë shërbim më të shpejtë.
Masa synon gjithashtu rritjen e transparencës së transaksioneve dhe uljen e përdorimit të parasë cash, si pjesë e përpjekjeve për formalizimin e ekonomisë.
Tatimet u kanë bërë thirrje të gjitha bizneseve që preken nga ky detyrim të marrin masat për instalimin e terminaleve në çdo pikë shitjeje brenda fundit të vitit 2026.
