Shqipëria është pajisur me sistemet raketore kundërtanke “Javelin”, në kuadër të bashkëpunimit me Shtetet e Bashkuara të Amerikës. Lajmi u bë i ditur nga ministri i Mbrojtjes, Pirro Vengu, i cili njoftoi se dërgesa e parë e njësive të lëshimit ka mbërritur tashmë në një bazë të Forcës Tokësore.
Sipas ministrit, pajisja me këto sisteme rrit ndjeshëm aftësitë mbrojtëse të Forcave të Armatosura, forcon parandalimin dhe ndërveprueshmërinë me NATO-n, si dhe kontribuon drejtpërdrejt në sigurinë kombëtare. Vengu theksoi se bëhet fjalë për një kërkesë të kahershme të Forcave të Armatosura, e realizuar përmes mbështetjes dhe bashkëpunimit strategjik me SHBA-të, ku përfshihen edhe programet e asistencës për rajonin.
Ministri bëri të ditur se kjo është vetëm dërgesa e parë e njësive të lëshimit dhe raketave përkatëse, ndërsa një dërgesë e dytë pritet gjatë vitit të ardhshëm. Sipas tij, sistemet Javelin do të rrisin gjithashtu efektivitetin e trupave shqiptare në misionet e NATO-s dhe të Bashkimit Evropian.
“Javelin” konsiderohet një nga armët kundërtanke më të sofistikuara në botë. Sistemi bartet në supe nga një ushtar i vetëm dhe funksionon me parimin “zjarr dhe harro”, që do të thotë se pas lëshimit raketa ndjek objektivin në mënyrë automatike, pa pasur nevojë për ndërhyrje të mëtejshme nga operatori. Kjo i mundëson ushtarit të largohet menjëherë në mbulim, duke rritur ndjeshëm mbijetesën në fushëbetejë.
Një veçori kryesore e Javelin është profili i sulmit nga lart. Raketat ngjiten mbi objektivin e zgjedhur dhe e godasin nga pjesa e sipërme, aty ku blindimi i tankeve dhe mjeteve të rënda është më i dobët.
Sistemi drejtohet me infra të kuqe, mund të përdoret si ditën ashtu edhe natën dhe është i përshtatshëm edhe për gjuajtje nga brenda ndërtesave apo bunkerëve.
Për përdorimin e tij, operatori shënjestron objektivin përmes Njësisë së Komandimit dhe Lëshimit, e njohur si CLU, e cila kryen identifikimin dhe kyçjen e objektivit përpara nisjes së raketës.
Sistemi është zhvilluar nga kompanitë Raytheon dhe Lockheed Martin për Ushtrinë Amerikane dhe përdoret gjerësisht nga vendet anëtare të NATO-s.
Sipas të dhënave publike, kostoja e një rakete “Javelin” i kalon 200 mijë dollarët amerikanë, duke e renditur atë ndër sistemet më të shtrenjta kundërtanke, por edhe ndër më efektivet në arsenalin modern ushtarak. /skyweb.al
