Çmimi i arit arriti një nivel rekord prej 4.525,96 dollarësh për ons, duke shënuar një rritje rreth 1 për qind, i nxitur nga shqetësimet për përshkallëzimin e tensioneve mes Shteteve të Bashkuara dhe Venezuelës, si dhe nga pritjet për ulje të mëtejshme të normave të interesit në SHBA.
Pas këtij rekordi historik, mëngjesin e sotëm ari tregtohej rreth 4.495,9 dollarë për ons, me një rritje vjetore prej afërsisht 72 për qind. Edhe çmimet e argjendit shënuan rritje mbi 1 për qind, duke arritur në 72,7 dollarë për ons, nivel gjithashtu historikisht i lartë. Në 12 muajt e fundit, argjendi ka regjistruar një rritje prej rreth 144 për qind.
Rritja e kërkesës për aktive të sigurta u nxitur nga shqetësimet për ngadalësimin e rritjes ekonomike globale dhe nga pritjet e tregjeve për ulje shtesë të normave të interesit në SHBA në vitin 2026, veçanërisht pas të dhënave më të forta se parashikimet për rritjen ekonomike amerikane gjatë tremujorit të tretë të këtij viti.
Ndërkohë, tensionet mes Uashingtonit dhe Karakasit janë përshkallëzuar pasi SHBA-ja ka intensifikuar mbikëqyrjen dhe masat ndëshkuese ndaj dërgesave të naftës që lidhen me Venezuelën. Kjo ka ngritur shqetësime për ndërprerje të mundshme të furnizimit global me naftë bruto, duke shtuar më tej pasigurinë gjeopolitike.
Presidenti amerikan Donald Trump ka deklaruar se Venezuela përdor të ardhurat nga nafta për të financuar emigracionin e paligjshëm dhe trafikun e drogës drejt SHBA-së. Një faktor tjetër i rëndësishëm që ka ndikuar në rritjen e çmimeve të arit është edhe blerja e shtuar e këtij metali nga bankat qendrore, me synimin për të forcuar rezervat valutore. /skyweb.al
