Kryeministri Edi Rama ka reaguar në lidhje me hetimet e SPAK, përfshirë edhe çështjen e njohur si dosja “Balluku”, duke ngritur shqetësime të forta për mënyrën se si po përdoren masat e sigurisë në Shqipëri.
Sipas Ramës, vendi ka hyrë në një fazë problematike, ku paraburgimi po aplikohet në mënyrë ekstreme, shpesh pa një vendim gjykate të arsyetuar dhe pa prova konkrete. Ai deklaroi se ka raste kur një prokuror dhe një gjyqtar marrin vendime për pezullimin ose arrestimin e një anëtari të qeverisë që është i zgjedhur, duke e cilësuar këtë praktikë si të papranueshme në një shtet të së drejtës.
Kreu i qeverisë tha se për këto raste institucionet janë detyruar t’i drejtohen Gjykatës Kushtetuese, për të kërkuar sqarim dhe vendosje të balancës mes pushteteve.
Rama iu referua edhe raporteve të Këshillit të Europës, sipas të cilave Shqipëria renditet ndër vendet më problematike për përdorimin e paraburgimit. Ai theksoi se në vendin tonë përdoret shpesh argumenti i paarsyetuar se i dyshuari “përbën rrezik për prishjen e provave”, një justifikim që, sipas tij, nuk shoqërohet me fakte konkrete.
“Jemi një vend skandaloz për burgosjen e njerëzve pa gjyq. Jemi në fund të listës së Këshillit të Europës, me diferencë të madhe nga vendet e tjera”, deklaroi Rama.
Ai solli në vëmendje shifra zyrtare që tregojnë se nga 4 492 persona aktualisht në burgjet shqiptare, vetëm 1 895 janë të dënuar me vendim të formës së prerë, ndërsa pjesa tjetër ndodhen në paraburgim. Sipas kryeministrit, kjo do të thotë se shumica e të burgosurve konsiderohen të pafajshëm nga Kushtetuta, por në praktikë trajtohen si të dënuar.
Rama kritikoi ashpër edhe klimën politike dhe mediatike, duke thënë se termat “burg”, “vjedhje” dhe “hajdut” përdoren pa kriter, duke ushtruar presion mbi sistemin e drejtësisë dhe duke ndikuar në vendimmarrje.
Sipas tij, Shqipëria ka kaluar edhe më parë një traumë të tillë, ku njerëzit ndëshkoheshin që në momentin e dyshimit, dhe jo pas një procesi të rregullt gjyqësor. Ai theksoi se probabiliteti për të përfunduar në burg si i dyshuar është më i lartë sesa për t’u dënuar si fajtor, duke e cilësuar këtë si një fakt tronditës për një shtet demokratik.
Në përfundim, Rama iu referua parimit themelor të drejtësisë, të theksuar edhe nga Këshilli i Europës: më mirë 100 fajtorë të lirë sesa një i pafajshëm në burg. Sipas tij, modeli “kap dhe fut brenda, pastaj shohim” nuk ka asnjë lidhje me drejtësinë dhe nuk duhet të jetë standardi i një vendi që synon të funksionojë mbi shtetin e së drejtës. /skyweb.al
