Kryeministri Edi Rama, gjatë konferencës së fundvitit me gazetarët, ka bërë një dallim të qartë mes akuzave për shpërdorim detyre, shkelje të barazisë në tendera dhe korrupsionit, duke theksuar se këto nuk janë e njëjta gjë dhe nuk mund të interpretohen si prova se vendi ka arritur “kulmin e korrupsionit”.
Sipas Ramës, korrupsioni është një vepër penale specifike, ndërsa shkeljet administrative apo penale të tjera nuk përbëjnë automatikisht korrupsion dhe nuk duhet të përdoren për të krijuar perceptime të rreme mbi situatën reale në vend.
Kreu i qeverisë komentoi edhe hetimet e SPAK që bazohen në mesazhe telefonike të gjetura në pajisjet e zyrtarëve, duke ngritur pikëpyetje mbi mënyrën se si SMS-të po trajtohen si prova përfundimtare dhe si material për gjykime publike.
“Që kur SMS-të janë prova? Që kur mesazhet janë ushqim për mediat? Që kur mbi baza mesazhesh bëhen gjyqe, si në kohën e gjuetisë së shtrigave?”, u shpreh Rama.
Ai sqaroi se mesazhet dhe çdo element tjetër janë pjesë e një procesi hetimor dhe nuk përjashtohen si prova, por paralajmëroi për pasojat që sjell ekspozimi publik dhe gjykimi paraprak i individëve. Sipas tij, duhet reflektuar seriozisht mbi përgjegjësinë që mbajnë të gjithë aktorët, në rast se një person rezulton i pafajshëm pas hetimit.
“Çfarë vlere ka pafajësia për një njeri, kur i është shkatërruar plotësisht jeta dhe familja?”, tha kryeministri.
Rama theksoi se në Shqipëri zhvillohen mijëra procedura prokurimi dhe miliona ndërveprime institucionale çdo vit, ndërsa rastet konkrete të hetimit dhe dënimit gjatë 12 viteve të qeverisjes janë të kufizuara. Sipas tij, rreth 37 raste hetimi dhe dënimi nuk përbëjnë një panoramë alarmante, por tregojnë se goditja e fenomeneve abuzive po bëhet në mënyrë selektive dhe jo masive.
Në përfundim, kryeministri nënvizoi se lufta kundër korrupsionit është e domosdoshme, por ajo nuk duhet të shndërrohet në një proces të dënimit publik pa vendim gjykate, duke cenuar parimet bazë të shtetit të së drejtës. /skyweb.al
