Ministri i Financave Petrit Malaj ka bërë të ditur se kostoja totale e situatës së krijuar nga përmbytjet në vend vlerësohet në mbi 50 milionë euro, ndërsa rreth 15 milionë euro janë parashikuar posaçërisht për dëmshpërblimet e qytetarëve të prekur.
Gjatë deklarimeve të tij, Malaj sqaroi se në programin e Emergjencave Civile janë planifikuar rreth 30 milionë euro, të ndara mes shpenzimeve kapitale dhe projekteve që lidhen me parandalimin e fatkeqësive natyrore. Sipas tij, rreth 15 milionë euro nga kjo shumë do të përdoren për investime që synojnë reduktimin e riskut nga fenomene të tilla.
Ministri bëri me dije gjithashtu se është parashikuar edhe një fond i kushtëzuar prej rreth 10 milionë eurosh, i cili administrohet nga Ministria e Mbrojtjes dhe do të shpërndahet te njësitë e vetëqeverisjes vendore. Shpërndarja e këtij fondi do të bazohet në një metodologji të ndërtuar mbi hartën e riskut që po përgatitet nga strukturat përkatëse.
Në dispozicion të situatës është edhe fondi rezervë i Këshillit të Ministrave, në vlerën e rreth 25 milionë eurove, i cili do të përdoret në varësi të vlerësimeve që do të kryhen nga institucionet përgjegjëse në terren. Përveç këtyre, Malaj tha se ekziston edhe një fond prej rreth 5 milionë eurosh për digat dhe rezervuarët, i cili synon financimin e projekteve për sigurinë e tyre.
Sipas Ministrit të Financave, të gjitha këto fonde së bashku përbëjnë një paketë financiare që kalon vlerën e 50 milionë eurove, e cila është vënë në dispozicion për përballimin e pasojave të përmbytjeve dhe menaxhimin e situatës emergjente në vend. /skyweb.al
