Autoritetet ruse kanë realizuar në heshtje tre fluturime evakuimi nga Izraeli brenda më pak se 24 orësh, duke transportuar drejt Rusisë zyrtarë dhe familjarë të tyre. Lëvizjet janë raportuar nga media izraelite dhe rajonale, pa u shoqëruar me asnjë sqarim zyrtar nga Moska.
Sipas Channel 14 në Izrael, fluturimet janë kryer pa njoftime publike dhe pa deklarata shpjeguese nga autoritetet ruse. Raporte të tjera në media ruse dhe iraniane flasin për një operacion me karakter urgjent, të zhvilluar me ritëm të përshpejtuar krahasuar me raste të ngjashme në të kaluarën.
Mungesa e transparencës dhe shpejtësia e evakuimeve kanë nxitur spekulime se Moska mund të ketë marrë informacione të ndjeshme për zhvillime të mundshme në rajon. Megjithatë, nuk ka asnjë të dhënë zyrtare mbi arsyet konkrete të këtij veprimi, as mbi identitetin apo numrin e saktë të personave të evakuuar.
Deri tani, Kremlini nuk ka reaguar publikisht për këto lëvizje, ndërsa autoritetet ruse kanë shmangur komentet mbi raportimet. Heshtja zyrtare po shton paqartësitë dhe e mban të hapur misterin mbi motivet reale të evakuimeve të fundit nga Izraeli. /skyweb.al
