Aleanca e Atlantikut të Veriut (NATO) ka njoftuar se do të optimizojë praninë e saj ushtarake në Kosovë, duke reduktuar gradualisht numrin e trupave të angazhuara në misionin e KFOR-it gjatë vitit të ardhshëm.
Sipas NATO-s, vendimi është rezultat i përmirësimit të vazhdueshëm të situatës së sigurisë në Kosovë gjatë viteve të fundit. Në këtë kuadër, aleanca kishte ndërprerë që në janar të këtij viti dislokimin e forcave rezervë, të cilat kishin qenë të angazhuara në rotacion të vazhdueshëm për më shumë se dy vjet.
Në një njoftim të publikuar, Komandanti Suprem i NATO-s në Evropë, gjenerali amerikan Alexus G. Grynkewich, deklaroi se kushtet aktuale të sigurisë krijojnë mundësi për rishikimin e madhësisë dhe pozicionimit të forcave të KFOR-it.
“NATO dhe KFOR-i mbeten plotësisht të përkushtuar ndaj sigurisë në Kosovë. Falë këtij përkushtimi dhe rritjes së kapaciteteve të institucioneve të sigurisë në Kosovë, situata e sigurisë ka shënuar përmirësime të dukshme”, thuhet në deklaratën e Grynkewich.
Aleanca theksoi se procesi i reduktimit të trupave do të realizohet në përputhje me zhvillimet në terren dhe se vendimi mund të rishikohet menjëherë në rast të përkeqësimit të gjendjes së sigurisë.
Njoftimi vjen në prag të 27-vjetorit të çlirimit të Kosovës, duke rikujtuar ndërhyrjen e NATO-s në vitin 1999. Pas 78 ditësh bombardimesh ndaj caqeve serbe, forcat aleate të udhëhequra nga Shtetet e Bashkuara hynë në Kosovë, duke i dhënë fund luftës dhe duke hapur rrugën për vendosjen e misionit paqeruajtës të KFOR-it.
